Վրաստանի «Մեդիաօմբուդսմեն» հասարակական կազմակերպության (ՀԿ) գնահատմամբ՝ 2024 թվականի հոկտեմբերի 26-ին Վրաստանի խորհրդարանի ընտրությունների լուսաբանման ժամանակ լրագրողների և օպերատորների աշխատանքային միջավայրը բնութագրվել է ագրեսիայով, ճնշումներով, սպառնալիքներով և նրանց մասնագիտական գործունեությանը միջամտելու փաստերով։
Կազմակերպությունը գրում է, որ քննադատող լրատվամիջոցների ներկայացուցիչների համար ընտրությունների հետ կապված տեղեկատվության ձեռքբերման և տարածման գործընթացը չափազանց բարդ և վտանգավոր է եղել։
Նշվում է՝ իշխող «Վրացական երազանք» կուսակցության ագրեսիվ խմբերը մոբիլիզացվել են ընտրական տեղամասերում, քվեարկության շենքի մուտքերի մոտ, մոտակայքում (այդ թվում՝ օրենքով արգելված հեռավորության վրա)։
«Նրանք ֆիզիկապես և բանավոր վիրավորել և հայհոյել են լրատվամիջոցների ներկայացուցիչներին։ Ագրեսիան հատկապես վտանգավոր է դարձել, երբ փորձել են փաստաթղթավորել և արձանագրել ընտրողների վրա ճնշումների, վերահսկողության և ընտրակաշառքի փաստերը։ Լրագրողների մեծամասնությունը խոսում է ընտրատեղամասերի մոտ, այսպես կոչված՝ մոբիլիզացվածների ագրեսիայի մասին: Անվտանգության միջոցառումներից ելնելով լրատվամիջոցների ներկայացուցիչները լքել են նկարահանման վայրը»,- ասված է հայտարարության մեջ:
Լրագրողները և օպերատորներն ասել են, որ քննադատող լրագրողների և դիտորդների նկատմամբ բռնությունը խրախուսվել է:
«Մեդիաօմբուդսմեն»-ն արձանագրել է 2024 թվականի հոկտեմբերի 25-ին և 26-ին Վրաստանի խորհրդարանական ընտրությունների լուսաբանման ժամանակ ԶԼՄ ներկայացուցիչների իրավունքների խախտման 30 դեպք։ Հանցավոր գործողություններով խախտվել են առնվազն 50 լրագրողների և օպերատորների իրավունքներ։
Ավելին՝ այստեղ:
