Վրաստանի խորհրդարանական մեծամասնության մաս և հակաարևմտյան ուժ հանդիսացող «Ժողովրդի ուժը» շարժումը հայտարարել է, որ կառավարությունը պետք է քննարկի, թե արդյո՞ք Վրաստանի գործընկեր երկրների արտաքին գործերի (ԱԳ) նախարարները և այլ բարձրաստիճան պաշտոնյաներ «արժանի են» երկիր մուտք գործելուն։
«Ժողովրդի ուժը» ԱԳ նախարարներին անվանել է Վրաստանի ընդդիմադիր «Միացյալ ազգային շարժում» կուսակցության կողմնակիցներ և մեղադրել Վրաստանի կառավարության վրա «հարձակվելու» համար։
«Ակնհայտ է, որ նրանց նպատակն է նպաստել Վրաստանում գործընթացների արմատականացմանը, քաղաքական գործընթացների և հասարակության բևեռացմանը, արմատական ընդդիմությանն աջակցությանը… Մենք կարծում ենք, որ Վրաստանի կառավարության բարձրագույն պաշտոնյաները պետք է ձեռնպահ մնան մեր երկիրը քանդելու եկած քաղաքական գործիչների հետ հանդիպումներից։
Մենք հաստատ գիտենք, որ վերջին երկու տարիներին Վրաստանի կառավարության դեմ նրանց արած հայտարարությունների հիմնական նպատակը մեր երկիրը պատերազմի մեջ ներքաշելն է և Ռուսաստանի դեմ երկրորդ ճակատ բացելը»,- նշված է հայտարարության մեջ։
Ի դեպ, Վրաստանի խորհրդարանում «գործակալների մասին օրենքի» քննարկմանը զուգահեռ, նախատեսվում է ԵՄ անդամ 4 երկրների (Գաբրելիուս Լանդսբերգիս՝ Լիտվա, Մարգուս Ցանկա՝ Էստոնիա, Տորդիս Գիլֆադոտրի՝ Իսլանդիա և Բայբա Բրազե՝ Լատվիա) արտգործնախարարների այցը Վրաստան:
Բացի այդ, Վրաստան են ժամանել Գերմանիայի Բունդեսթագի արտաքին հարաբերությունների հանձնաժողովի նախագահ Միխայիլ Ռոթը և Լիտվայի Սեյմի արտաքին հարաբերությունների հանձնաժողովի նախագահ Ժիգիմանտաս Պավլիոնիսը։ ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ’Բրայենը ևս կժամանի Վրաստան։
«Գործակալների օրենքը» նախաձեռնել է իշխող «Վրացական երազանքը»՝ «Ժողովրդի ուժը»-ի հետ միասին։ Օրենքի նախագիծը խորհրդարանն ընդունել է երկու ընթերցմամբ, մնացել է երրորդ քվեարկությունը։
Մայիսի 10-ին խորհրդարանի նախագահ Շալվա Պապուաշվիլին «Վրացական երազանք» կուսակցության գրասենյակում մեծամասնության նիստն ավարտելուց հետո լրատվամիջոցներին տված մեկնաբանությունում ասել է, որ չի հանդիպելու եվրոպական երկրների արտաքին հարաբերությունների հանձնաժողովների նախագահների հետ։
