«Ժողովրդավարության հետազոտական կենտրոն»-ը (DRC) նշել է, որ նոյեմբերի 19-ի լուսադեմին ՆԳՆ-ն Թբիլիսիի պետական համալսարանի առաջին մասնաշենքի մոտ «լիովին անհամաչափ ուժ է կիրառել խաղաղ հավաքը ցրելու նպատակով»։
Կազմակերպության գնահատմամբ՝ տագնապալի է նաև, որ ձերբակալվածների փաստաբաններին հնարավորություն չի տրվում տեսակցելու կալանավորվածներին։ Ըստ ՆԳՆ-ի՝ ցույցի ժամանակ ձերբակալվել է 16 մարդ, նրանցից երեքը ստորագրությամբ ազատ են արձակվել։
«Տարածված կադրերից պարզ երևում է, որ ոստիկանության ներկայացուցիչների թիվը մի քանի անգամ ավելի է եղել, քան խաղաղ հավաքի մասնակիցների թիվը, և ոչ մի դեպքում ֆիզիկական ուժ կիրառելու անհրաժեշտություն չի եղել։
Թեև ոստիկանությունն օրենքով սահմանված դեպքերում իրավունք ունի ուժ գործադրելու ցույցը ցրելու համար, սակայն դա վերաբերում է միայն այն ցույցերին, որոնք իրենց բնույթով բռնի են։ Նոյեմբերի 19-ի վաղ առավոտյան համալսարանի առաջին մասնաշենքի դիմաց և Ճավճավաձեի պողոտայում մի քանի հանգամանքներ անօրինական են դարձնում ոստիկանների գործողությունները.
1. Հավաքի խաղաղ բնույթը և դրա մասնակիցների ընդգծված խաղաղ պահվածքը,
2. Ոստիկանության ուժերի անհամաչափ մեծ թիվը և ֆիզիկական ուժի խստությունը.
3. Երկու օր շարունակվող նույն ակցիայի վերաբերյալ պետական և տեղական իշխանությունների կողմից որևէ տիպի նախազգուշացման բացակայությունը»,- հայտարարել է կազմակերպությունը։
Հիշեցնենք. վաղ առավոտյան ոստիկանները բռնի ուժի գործադրմամբ ցրել են Ճավճավաձեի պողոտայում` Թբիլիսիի պետական համալսարանի մոտ ընթացող խաղաղ ցույցը։
Մինչ այդ ոստիկանությունը Facebook-ում հայտարարություն էր տարածել, որտեղ նշված էր, որ պատրաստվում են ցրել հանրահավաքը, իսկ ցուցարարներին 15 րոպե ժամանակ էր տրվել Ճավճավաձեի պողոտան ազատելու համար։
Ճավճավաձեի պողոտայից ցուցարարները շարժվել են դեպի Մելիքիշվիլիի փողոց։ Ոստիկանները Ճավճավաձեից շարժվել են դեպի Մելիքիշվիլի և բերման ենթարկել ցուցարարներին:
