Ուկրաինայի նախագահ Վլադիմիր Զելենսկին անդրադարձել է Վրաստանի ժողովրդի աջակցությանը Ուկրաինային` նշելով, որ լինում են դեպքեր, երբ քաղաքացիներն ավելի լավ կառավարություն են։
«Անհավանական վրացի մարդիկ, ովքեր հասկանում են, որ ընկերներին պետք է աջակցել: Շնորհակալություն եմ հայտնում բոլորին՝ Թբիլիսիում և այլ քաղաքներում, ովքեր դուրս էին եկել ի պաշտպանություն Ուկրաինայի և ընդդեմ պատերազմի։
Իսկապես, լինում են դեպքեր, երբ քաղաքացիները թեև կառավարություն չեն, սակայն կառավարությունից ավելի լավն են» — թվիթերյան իր էջում գրել է Վլադիմիր Զելենսկին։
Հիշեցնենք, որ Վրաստանի վարչապետ Իրակլի Ղարիբաշվիլին երեկ՝ փետրվարի 25-ին հայտարարել էր, որ «Ուկրաինա մեկնել չի պատրաստվում, դա ոչինչ չի տա», ինչպես նաև՝ Վրաստանը չի պատրաստվում միանալ Ռուսաստանի դեմ տնտեսական պատժամիջոցներին։
_____________________________________________________________________________
Փետրվարի 24-ին Ռուսաստանի նախագահ Վլադիմիր Պուտինը հայտարարեց Ուկրաինան «ապառազմականացնելու» «հատուկ գործողության» մասին։ Առավոտից հաղորդվում է մայրաքաղաք Կիևում և այլ խոշոր քաղաքներում պայթյունների, կրակոցների մասին։
Նշենք նաև, որ Ռուսաստանը պաշտոնապես ճանաչել է Դոնբասի և Լուգանսկի ինքնահռչակ հանրապետությունների անկախությունը։ Միջազգային հանրությունը մեծամասամբ դատապարտում է պաշտոնական Մոսկվայի այդ քայլը։
Ուկրաինայի նախագահ Վլադիմիր Զելենսկին փետրվարի 24-ին ողջ երկրի տարածքում ռազմական դրություն է հայտարարել, նա հաստատել է, որ Ռուսաստանը հարվածներ է հասցնում ուկրաինական ռազմական և սահմանապահ ենթակառուցվածքների վրա։
