Մարտի 13-ին Վրաստանի դատախազության պահանջով կալանք է դրվել այն անձանց գույքի վրա, ովքեր, ըստ լրագրողական հետաքննության, մասնակցել են «խարդախ զանգերի կենտրոնների», A.K. Group ՍՊԸ-ի սխեմային:

Լրագրողական հետաքննությունը հրապարակվել է անցյալ շաբաթ՝ մարտի 5-ին, Հետաքննող լրագրողների iFact միության, Կազմակերպված հանցավորության և կոռուպցիայի հաշվետվությունների գործակալության (OCCRP), Studio Monitor-ի և «Կառավարման մոնիտորինգի կենտրոն»-ի (Gmc) և մոտ 30 այլ միջազգային լրատվամիջոցների կողմից։

Լրագրողական հետաքննության հրապարակումից 8 օր անց Վրաստանում կալանք է դրվել A.K. Group ՍՊԸ-ի ղեկավարների ու գործակալների մի շարք անշարժ գույքի վրա, այս տեղեկությունն առաջինը տարածել է Studio Monitor-ը:

Մասնավորապես առգրավվել են.

• Խմբի ենթադրյալ ղեկավար Ակակի Քևխիշվիլիի անշարժ գույքը, ընկերության բաժնեմասը և նրա մոր անունով գրանցված գույքը,
• Մերի Շոթաձեի ընկերության բաժնեմասը և անշարժ գույքը, որը նա այլ անձի է փոխանցել փետրվարի 25-ին,
• Մարիամ Չարչիանիի ամուսնու անունով գրանցված երկու բնակարան Թբիլիսիում,
• Լանա Վախթանգաձեի անունով Թբիլիսիում գրանցված ավտոկայանատեղին,
• Թախիր Սուլթանովի անվամբ հողամաս Մցխեթայում և բնակարան Թբիլիսիում:

Այս փոփոխություններն արդեն իսկ արտացոլված են հանրային և բիզնես ռեեստրներում։

Ըստ միջազգային հետաքննության, Թբիլիսիից թալանվում էին եվրոպացիներն ու կանադացիները. խաբեբաները տուժածներին զրկում էին վերջին խնայողություններից, մինչդեռ իրենք ապրում էին շքեղ պայմաններում։

Հետաքննող լրագրողները միմյանց հետ համագործակցել են Վրաստանում գործող «խարդախ զանգերի կենտրոնների» ղեկավարներին և նրանց ենթականերին բացահայտելու համար։ Փաստաթղթերում նշված է, որ.

• 3 տարվա ընթացքում խաբվել է ավելի քան 6000 մարդ. նրանցից գողացել են մոտ 36 միլիոն դոլար,
• Տուժածների թվում կան տարբեր տարիքի մարդիկ, այդ թվում՝ թոշակառուներ։

«Զանգերի կենտրոններ»-ի վրացական «կայսրություն». լրագրողական հետաքննություն