Եվրախորհրդարանը Վրաստանի վերաբերյալ ևս մեկ քննադատական բանաձև է ընդունել՝ կոչ անելով պատժամիջոցներ կիրառել «Վրացական երազանք»-ի հետ կապված էլիտայի դեմ։ Նոր բանաձևի նախագծում Եվրախորհրդարանի պատգամավորներն ընդլայնել են այն մարդկանց ցուցակը, որոնց նկատմամբ պահանջում են կիրառել եվրոպական պատժամիջոցներ։
Բանաձևին կողմ է քվեարկել 400 պատգամավոր, դեմ՝ 63։ Ձեռնպահ է քվեարկել 81 պատգամավոր։ Բանաձևի համաձայն՝ Եվրախորհրդարանը Եվրամիության խորհրդին և անդամ երկրներին կոչ է արել պատժամիջոցներ կիրառել Բիձինա Իվանիշվիլիի կողմնակիցների ցանցի, էլիտար շրջապատի, կոռումպացված ֆինանսիստների, քարոզիչների և ռեպրեսիվ պետական ապարատին աջակցողների դեմ։
Ըստ Եվրախորհրդարանի պատգամավորների՝ այս կատեգորիաներին պատկանող մարդկանց ցուցակում են Իվանիշվիլիի ընտանիքի անդամները. կինը՝ Էկատերինա Խվեդելիձեն և երեխաները՝ Ուտա, Ցոտնե, Բերա և Գվանցա Իվանիշվիլիները: Այս ցանկում են նաև այլ բարձրաստիճան պաշտոնյաներ:
Վրաստանի վերաբերյալ նախորդ բանաձևի նման, Եվրախորհրդարանի պատգամավորները այժմ պահանջում են պատժամիջոցներ կիրառել Բիձինա Իվանիշվիլիի, «Վրացական երազանք»-ի Իրակլի Կոբախիձեի, Թբիլիսիի քաղաքապետ Կախա Կալաձեի, չլեգիտիմիացված խորհրդարանի նախագահ Շալվա Պապուաշվիլիի, ՆԳՆ նախարար Վախթանգ Գոմելաուրիի և նախկին վարչապետ Իրակլի Ղարիբաշվիլիի նկատմամբ։
Քվեարկության նախօրեին «Վրացական երազանք»-ի վարչապետ Իրակլի Կոբախիձեն ասել էր, որ Եվրախորհրդարանի բանաձեւը «գրոշի արժեք չունի»։
ԵՄ անհատական պատժամիջոցների սահմանումը պահանջում է անդամ բոլոր երկրների համաձայնությունը։ Այս փուլում դա անհնար է. Հունգարիան և Սլովակիան դեմ են «Վրացական երազանք»-ի հետ կապված պատժամիջոցներին։ Միով բանիվ, բանաձևը կոչ է արել անդամ երկրներին ազգային մակարդակով կիրառել անհատական պատժամիջոցներ:
