Վրաստանի հաշտեցման և քաղաքացիական հարցերով պետնախարար Քեթևան Ցիխելաշվիլին ապրիլի 14-ին մայրենի օրվան նվիրված միջոցառման ընթացքում պարգևատրել է «Ես գրում եմ վրացերեն» մրցույթի հաղթողներին:
Մրցույթը հայտարարվել էր մի քանի շաբաթ առաջ, ոչ վրացալեզու դպրոցների 9-րդ դասարանի աշակերտների համար: Մրցույթի նպատակն էր պետական լեզվի տարածումը, էթնիկ փոքրամասնությունների շրջանում վրացերենի նկատմամբ հետաքրքրվածության ավելացումը։
Թբիլիսիի պետական համալսարանում տեղի ունեցած միջոցառման ընթացքում պետնախարարը շնորհավորել է ներկաներին և խոսել լեզվի կարևորության ու այն տարածելու և պահպանման հարցում երիտասարդության մեծ դերի մասին:
Ինչ վերաբերում է մրցույթին, այն տեղի է ունեցել երեք փուլով: Եզրափակիչ փուլում մասնակիցները գրող Բեքա Քուրխուլիի ստեղծագործության հատվածի թելադրություն են գրել: Հաղթողները երեքն են՝ Այտան Մեխտիևան, Մանուշակ Վարդանյանը և Անաստասիա Մինասովան: Նրանք պարգևատրվել են պատվոգրերով և նվերներով:
Մրցույթն անցկացվել է Թբիլիսիի պետական համալսարանի և Վրաստանի կրթության, գիտության, մշակույթի և սպորտի նախարարության աջակցությամբ:
