Երիտասարդության գործակալությունը մշակույթի, սպորտի և երիտասարդության նախարարությունից կտեղափոխվի կրթության և գիտության նախարարություն (ԿԳՆ)։
Ըստ Վրաստանի կրթության և գիտության նախարար Գիորգի Ամիլախվարիի՝ նշված որոշումն ընդունվել է կառավարության նիստում, և օրենսդրական փոփոխությունների փաթեթը կուղարկվի խորհրդարան։
«Կառավարության խորհրդակցության ժամանակ որոշում է կայացվել, որ կրթության և գիտության նախարարությունում մեր ծրագրերի շրջանակներում՝ սկսած դպրոցից, մասնագիտական կրթությունից և բարձրագույն կրթությունից, մենք արդեն ունենք բաղադրիչներ, որոնք, բացի կրթությունից, ներառում են տարբեր միջոցառումներ և երիտասարդական քաղաքականություն։ Նպատակահարմար համարվեց, որ երիտասարդական քաղաքականության և կրթության մերձեցման արդյունքում այս գերատեսչության գործունեությունը շարունակվի կրթության և գիտության նախարարությունում։
Օրենքների նախագծերի ցանկը կներկայացվի խորհրդարան, և հաջորդ տարվանից կձևավորվի նոր նախարարություն, որի անունը կլինի կրթության, գիտության և երիտասարդության նախարարություն, որին կավելանա երիտասարդական գործակալությունը»,- ասել է Ամիլախվարին:
Ի դեպ, կրթության և մշակույթի նախարարությունները մեկ անգամ չէ, որ վերակազմավորվել են։ Մշակույթի նախարարությունը կրթության և գիտության նախարարությանը միացել է 2018 թվականին: 2021 թվականին մշակույթի ոլորտն առանձնացվեց կրթությունից և կրկին ձևավորվեց որպես առանձին նախարարություն։ Մշակույթի նախարարությունը ներառում էր երիտասարդական գործակալությունը, որը ստեղծվել է 2019 թվականին Մամուկա Բախտաձեի վարչապետության օրոք և ի սկզբանե գործել է կառավարության ղեկավարման ներքո։
