Վրաստանյան մի շարք հասարակական կազմակերպություններ (ՀԿ) հայտարարություն են տարածել՝ պահանջելով Ռուսաստանի քաղաքացիների համար վիզային ռեժիմ սահմանել:
Վրաստանի կողմից չվերահսկվող Աբխազիայի դե ֆակտո էկոնոմիկայի նախարարությունը հայտարարել է, որ Սոխումիի օդանավակայանի ենթակառուցվածքային օբյեկտները կմնան «պետական սեփականության և կառավարման ներքո»։
Վրաստանում ԱՄՆ դեսպան Քելլի Դեգնանի խոսքով, Վրաստանում գտնվելու ընթացքում ամեն օր փորձել է քաղաքական առաջնորդներին հաշտեցնել։
Վրաստանի վարչապետ Իրակլի Ղարիբաշվիլիի նախաձեռնությամբ մեկնարկում է կառավարության լայնածավալ ծրագրի իրականացումը. այս տարվա սեպտեմբեր-հոկտեմբեր ամիսներին կսկսվի 800 դպրոցի շինարարական-վերականգնման աշխատանքների առաջին փուլը, իսկ շինարարության համար մրցույթ կհայտարարվի 80 նոր դպրոցի կառուցման և 320 դպրոցի վերականգնման համար:
Վրաստանի նախագահ Սալոմե Զուրաբիշվիլին Սամեգրելոյի շրջան կատարած այցի ընթացքում «Էնգուրհես»-ի մոտ ասել է, որ Վրաստանի էներգետիկ անկախությունն ուղղակիորեն կապված է «Էնգուրհես»-ի և այլ հիդրոէլեկտրակայանների կառուցման հետ:
Վրաստանի ընդդիմադիր «Մթավարի արխի» հեռուստաընկերությունը հայտարարություն է տարածել առավոտյան հաղորդման հաղորդավար Լաշա Նակաիձեի ձերբակալության վերաբերյալ և հայտարարել, որ դադարեցնում է վերջինիս հետ ցանկացած համագործակցություն։
Վրաստանի երրորդ նախագահ, այժմ անազատության մեջ գտնվող Միխեիլ Սաակաշվիլին ուկրաիներենով նամակ է հրապարակել, որտեղ նշել է, որ անձամբ ցանկանում է մասնակցել Ուկրաինայի ազատության համար մղվող պայքարին։
Թուրքական Demirören Holding (Demirören Holding) խոշորագույն կոնգլոմերատը շահագրգռված է Արևմտյան Վրաստանի հայտնի բալնեոլոգիական հանգստավայրի՝ Ծղալտուբոյի վերանորոգման նախագծով, որը վերջին երեք տասնամյակների ընթացքում անկում է ապրել։
Վրաստանի ազգային մրցակցության գործակալությունը սկսել է Վրաստանի ավտոմոբիլային վառելիքի շուկայի հետաքննությունը։
Վրաստանի ցորեն և ալյուր արտադրողների ասոցիացիայի ղեկավար Լևան Սիլագավան հայտնել է, որ փոքր քանակությամբ, սակայն, ցորենի ներկրումը վերսկսվել է:
Եվ վերջում՝ Ազգային բանկի հրապարակած տվյալների համաձայն՝ կայացած առուվաճառքի արդյունքում 1 դոլարի արժեքը դարձել է 2,8019 լարի։ Ինչ վերաբերում է եվրոյին, ապա դրա փոխարժեքը կազմում է 2,8507 լարի։
