Երեկվա գլխավոր թեման «Վրացական երազանք»-ի միակուսակցական խորհրդարանի երրորդ ընթերցմամբ ընդունած 7 օրենքներն էին. մեդիայի և քաղաքացիական հասարակության կազմակերպությունների սահմանափակման մասին օրենքը և մի շարք այլ ռեպրեսիվ օրենքներ, որոնք, ըստ փորձագետների՝ միտված են քաղհասարակության ու անկախ ձայների ճնշմանը Վրաստանում։ Այդ 7 օրենքներից մի քանիսն ուժի մեջ կմտնեն «Վրացական երազանք»-ի ընտրած 6-րդ նախագահ Միխեիլ Կղավելաշվիլիի ստորագրումից անմիջապես հետո, իսկ մյուսները` 60 օր անց։ «Ալիք Մեդիա Վրաստան»-ը 7 օրենքներն ու դրանք ռեպրեսիվ բնույթը ներկայացրել է մեկ հոդվածում:
Վրաստանի 5-րդ նախագահ Սալոմե Զուրաբիշվիլին ապրիլի 1-ին մի քանի ընդդիմադիր քաղաքական կուսակցությունների ներկայացուցիչների հետ խորհրդակցություններից հետո լրատվամիջոցների համար ճեպազրույցում խոսել է «առաջին հանդիպման» մասին։
Վրաստանի դատախազությունը մեղադրանք է առաջադրել «Ուժեղ Վրաստան/Լելո» կուսակցության առաջնորդ Մամուկա Խազարաձեին. վերջինիս սպառնում է 1 տարվա ազատազրկում։
2008-2012 թվականներին խորհրդարանի պաշտպանության և անվտանգության հանձնաժողովի նախագահ Գիվի Թարգամաձեն հրավիրվել է խորհրդարանում գտնվող «Վրացական երազանք»-ի ժամանակավոր քննչական հանձնաժողով։ Նա հրաժարվել է ներկայանալ, թեև մերժումը պատժվում է մեկ տարվա ազատազրկմամբ։
Ամերիկյան Forbes ամսագրի միլիարդատերերի ինդեքսի համաձայն, որը թարմացվել է 2025 թվականի ապրիլի 1-ին, «Վրացական երազանք»-ի հիմնադիր և պատվավոր նախագահ Բիձինա Իվանիշվիլիի ու նրա ընտանիքի կարողությունը նախորդ տարվա 4,9 միլիարդ դոլարից նվազել է մինչև 2,7 միլիարդ դոլար։
Բրիտանական Byline Times պարբերականը ծավալուն հետաքննություն է հրապարակել «Վրացական երազանք»-ի հիմնադիր ու պատվավոր նախագահ Բիձինա Իվանիշվիլիի Մոսկվայի ռեժիմի հետ կապերի մասին։
ԱՄՆ Հելսինկյան հանձնաժողովի համանախագահ, կոնգրեսական Ջո Ուիլսոնը (Հանրապետական կուսակցություն) X սոցիալական ցանցում գրել է Վրաստանի համար մարտի 31-ի նշանակության մասին:
Վրաստանի անձնական տվյալների պաշտպանության ծառայությունը քաղաքական գործիչ Ալեկո Էլիսաշվիլիի գործով «Վիվամեդ» կլինիկային խախտող է ճանաչել և պահանջել է գլխավոր տնօրեն Նինո Նադիրաձեից` ջնջել Էլիսաշվիլիի անձնական տվյալները պարունակող ֆեյսբուքյան գրառումը։
Վրաստանի «Սոցիալական արդարության կենտրոն» (SJC) իրավապաշտպան հասարակական կազմակերպությունը (ՀԿ) դիմել է Թբիլիսիի քաղաքային դատարան՝ պաշտպանելու արդարադատության նախարարությունից աշխատանքից ազատված պետական ծառայողներ Նինո Տղկեշելաշվիլիի, Նաթիա Ալիաշվիլիի և Մորիս (Կոբա) Բարամիայի շահերը։
Վրաստանից չվերահսկվող Ցխինվալիի (Հարավային Օսիա) շրջանի դե ֆակտո նախագահ Ալան Գագլոևը կմասնակցի Վրաստանից չվերահսկվող Աբխազիայի դե ֆակտո նախագահ Բադրա Գունբայի «երդմնակալությանը», որը նախատեսված է ապրիլի 2-ին:
Վրացի ակտիվիստ Թեմուր Քաթամաձեն վերսկսել է հացադուլը. նա հասարակությանը հայտնի է որպես «բաթումցի դրոշակակիր»։
Բաթումիի քաղաքային դատարանում ընթացել է Մզիա Ամաղլոբելիի դատավարությունը։ Հաջորդ նիստը տեղի կունենա ապրիլի 14-ին, ժամը 13:00-ին։
Վրաստանի հավաքականի կիսապաշտպան Գիորգի Քոչորաշվիլին իսպանական «Լևանտե» ակումբից տեղափոխվում է պորտուգալական «Սպորտինգ» (Sporting CP):
