Եվրոպական խորհուրդը մարտի 21-ին Բրյուսելում ԵՄ անդամ երկրների ղեկավարների երկօրյա գագաթնաժողովի առաջին աշխատանքային օրվա ավարտին եզրակացություն է հրապարակել, որը վերաբերում է մի շարք հարցերի, այդ թվում՝ Եվրամիության ընդլայնմանը։
Խորհուրդը ողջունում է Ուկրաինայի և Մոլդովայի առաջընթացը ԵՄ ճանապարհին անհրաժեշտ բարեփոխումներն առաջ մղելու հարցում և աջակցում է այդ երկրների հետ անդամակցության բանակցությունների շրջանակային փաստաթղթերի արագ ընդունմանը:
Եվրոպական խորհուրդը հաշվի է առնում Վրաստանի շարունակական ջանքերը և կոչ է անում երկրին առաջ գնալ առաջնահերթ բարեփոխումներում։
Վրաստանը՝ որպես ԵՄ անդամակցության թեկնածու երկիր, պետք է կատարի Եվրահանձնաժողովի կողմից սահմանված 9 առաջնահերթությունները՝ հաջորդ փուլ անցնելու և բանակցություններ սկսելու համար։ Դրանց թվում են Եվրամիության և նրա արժեքների դեմ ապատեղեկատվության դեմ պայքարը, Եվրամիության ընդհանուր արտաքին և անվտանգության քաղաքականության հետ Վրաստանի համապատասխանեցման բարելավումը, քաղաքական բևեռացման հաղթահարումը, դատական բարեփոխումների ավարտը և խորհրդարանական վերահսկողության բարելավումը, ապաօլիգարխացման գործողությունների ծրագիրը և մարդու իրավունքների պաշտպանությունը:
Ի դեպ, ԵՄ երկրների ղեկավարները 2022 թվականին Ուկրաինային և Մոլդովային շնորհել են անդամակցության թեկնածուի կարգավիճակ, իսկ Վրաստանին՝ եվրոպական հեռանկար։ 2023 թվականի դեկտեմբերի գագաթնաժողովում Եվրամիությունը որոշեց բանակցություններ սկսել Ուկրաինայի և Մոլդովայի հետ. Վրաստանին անդամակցության թեկնածուի կարգավիճակ շնորհեց։
Վրաստանի ընդդիմության և ոչ կառավարական հատվածի ներկայացուցիչները քննադատում են իշխող «Վրացական երազանքի» կառավարությանը՝ եվրաինտեգրման ճանապարհով երբեմնի զարգացած Վրաստանին հետ մղելու համար։ «Վրացական երազանքի» կառավարությունը պնդում է, որ Վրաստանին Ուկրաինայից և Մոլդովայից ուշ թեկնածուի կարգավիճակ շնորհելն անարդար որոշում էր։
