Այսօր՝ ապրիլի 15-ին, Վրաստանի խորհրդարանում «Գործակալների օրենքի» քննարկմանը զուգահեռ, օրենսդիրը խստացնում է անվտանգության կանոնները։ Մասնավորապես՝ ամբողջությամբ սահմանափակվում է այցելուների մուտքն օրենսդիր մարմին, առցանց լրատվամիջոցների լրագրողներին ևս թույլ չի տրվի աշխատել խորհրդարանից։ Անգամ այն լրագրողները, ովքեր ունեն խորհրդարանի կողմից տրված հավատարմագրում, չեն կարողանա ներկա գտնվել վիճահարույց օրինագծի հանձնաժողովի լսումներին և քննարկումներին։
Խորհրդարանը լրատվամիջոցների աշխատանքի սահմանափակումը բացատրում է անվտանգության նորմերով. «Նպատակը Վրաստանի խորհրդարանում աշխատանքային և անվտանգ միջավայր ապահովելն է»,- գրված է Վրաստանի խորհրդարանի նախօրեի երեկոյան տարածած հայտարարության մեջ։
Ի դեպ, վերջին օրերին իշխանությունն իր վարած արտաքին քաղաքականության համար ընդդիմության, քաղհասարկության և արևմտյան երկրների քննադատության թիրախում է։ Ապրիլի 3-ին իշխող կուսակցությունը կրկին խորհրդարան է ներկայացրել այսպես կոչված «գործակալների մասին օրենքը», որը նախագահը, անկախ լրատվամիջոցները և հասարակական կազմակերպությունները անվանում են «ռուսական օրենք»:
