Վրաստանի խորհրդարանի Եվրոպական ինտեգրման հանձնաժողովի նախագահ Մակա Բոճորիշվիլին և նրա տեղակալ Լևան Կարումիձեն հանդիպել են Եվրախորհրդարանի պատգամավորների հետ։
Խորհրդարանի մամուլի ծառայությունից հայտնել են, որ հանդիպումները կայացել են Ստրասբուրգ կատարած այցի ընթացքում։
Հանդիպումներ են տեղի ունեցել Եվրախորհրդարանի առաջին փոխնախագահ Օտմար Կարայի, Եվրանեսթի խորհրդարանական վեհաժողովի համանախագահ Անդրիուս Կուբիլիուսի, արտաքին հարաբերությունների հանձնաժողովի փոխնախագահ Վիտոլդ Վաշչիկովսկու, ինչպես նաև Եվրախորհրդարանի բոլոր քաղաքական խմբերի ղեկավարների և Եվրախորհրդարանի տարբեր հանձնաժողովների անդամների հետ։
Ըստ խորհրդարանի մամուլի ծառայության՝ զրույցի հիմնական թեմաներն են եղել Ուկրաինայի դեմ Ռուսաստանի ագրեսիան և տարածաշրջանում անվտանգության բարդ իրավիճակը, Վրաստանի առջև ծառացած մարտահրավերները և դրանց դեմ պայքարի ուղիները, ԵՄ-ին Վրաստանի ինտեգրման հեռանկարները և ԵՄ անդամակցության դիմումի հետագա քայլերը.
«Վրացական կողմն ընդգծել է ասոցացված գործընկերների նկատմամբ ԵՄ ինտեգրման գործընթացի արագացման և եվրոպական կողմից հստակ ուղերձների անհրաժեշտությունը, ինչպես նաև ԵՄ անդամակցության գործընթացում գործընկերներին աջակցելու և նրանց հետ ակտիվ համագործակցելու անհրաժեշտությունը»:
Նշվում է, որ Եվրախորհրդարանի պատգամավորները նշել են, որ հաշվի առնելով տարածաշրջանում ստեղծված իրավիճակը, անհրաժեշտ է սերտորեն համակարգվել գործընկեր երկրների հետ և մեծացնել նրանց քաղաքական աջակցությունը։
