Վրաստանի խորհրդարանը պաշտպանել է իշխող «Վրացական երազանք» կուսակցության շարքերը լքած և հակաարևմտյան «Ժողովրդի ուժը» շարժումը հիմնած պատգամավորների նախագիծը, ըստ որի՝ եթե մեկ կուսակցության առաջադրմամբ ընտրված պատգամավորները դուրս գան կուսակցությունից, դրանից հետո իրավունք կունենան քաղաքական խումբ ստեղծելու խորհրդարանում։

Հաշվի առնելով նշված փոփոխությունը, որը խորհրդարանը երրորդ ընթերցմամբ հավանություն է տվել 76 ձայնով, քաղաքական խումբ կստեղծեն «Ժողովրդի ուժը» շարժման և «Վրաստանի համար» կուսակցության ներկայացուցիչները։

Հատկանշական է, որ 2024 թվականի գումարման խորհրդարանում առնվազն երկու պատգամավոր կարող է քաղաքական խումբ ստեղծել, սակայն հիմա «Վրացական երազանքից» դուրս եկած պատգամավորները չեն կարող քաղաքական խումբ ստեղծել։

Հաշվի առնելով կանոնակարգը՝ քաղաքական խումբը կօգտվի նույն իրավունքներից, ինչ խորհրդարանական խմբակցությունը, այդ թվում՝ ֆինանսավորման առումով։ Քաղաքական խմբին խորհրդարանի պալատում աշխատանքային տարածք կհատկացվի։

Խմբի գործունեությունը ապահովելու համար հատկացվող գումարը կորոշվի համամասնորեն` ըստ խմբում միավորված խորհրդարանի անդամների թվի։ Խմբի գրասենյակի աշխատողների աշխատավարձի ֆոնդը կորոշվի համամասնորեն` ըստ ներկայացվածության, նույն կերպ էլ՝ խմբակցությանը: