Միջազգային հեղինակավոր World Press Photo կազմակերպությունը հայտարարել է, որ կբարելավի մրցույթի կանոնները. սա կազմակերպության պատասխանն է վրացի ֆոտոլրագրողների և ֆոտոփաստագրողների քննադատությանը, որի պատճառը Կրեմլի «ՏԱՍՍ» լրատվական գործակալության աշխատակից Միխայիլ Տերեշչենկոյին որպես 2025 թվականի մրցույթի հաղթող ներկայացնելն է։

«Մենք կձգտենք բարելավել մեր քաղաքականությունն ու ընթացակարգերը պետական ​​վերահսկվող գործակալություններում աշխատող լուսանկարիչների հետ կապված: Մենք կխորհրդակցենք այնպիսի լուսանկարիչների հետ, որոնք աշխատում են այնպիսի վայրերում, ինչպիսիք են Վրաստանը և Ուկրաինան», — ասված է հայտարարության մեջ:

Կազմակերպության պարզաբանմամբ` պետք է հաշվի առնել համատեքստը՝ 2008 թվականի օգոստոսին Ռուսաստանի ներխուժումը Վրաստան և երկրի մի մասի օկուպացիան, նաև լուսանկարի վայրը՝ եվրոպամետ ցույցեր, որոնց ընթացքում ոստիկանները ֆիզիկական բռնության են ենթարկել լրագրողներին և քաղաքացիներին։

Օրեր առաջ հայտարարվեց, որ 2025 թվականի World Press Photo-ի «Եվրոպայից լուսանկարչական պատմություն» անվանակարգում հաղթողը ռուս լուսանկարիչ է։ Կրեմլի «ՏԱՍՍ» լրատվական գործակալության աշխատակից Միխայիլ Տերեշչենկոն մրցույթին ներկայացրել է Թբիլիսիի բողոքի ցույցերի ժամանակ արված ֆոտոպատմություն։

2024 թվականի գարնանային և նոյեմբեր-դեկտեմբերի բողոքի ակցիաները նկարահանած լուսանկարիչները կարծում են, որ ռուս լուսանկարչի աշխատանքը թույլ է, և որ ժյուրին բավարար զգայունություն չուներ համատեքստը հաշվի առնելու համար։ Այդ իսկ պատճառով նրանք համատեղ հայտարարությամբ դիմել են World Press Photo-ին։

Վրացի լուսանկարիչները բողոքել են ռուսական «ՏԱՍՍ»-ի ներկայացուցչի մրցանակի դեմ