Վրաստանի կառավարության կողմից խորհրդարան ներկայացված մակրոտնտեսական և հարկաբյուջետային պարամետրերի վերաբերյալ փաստաթղթի համաձայն՝ այս տարի Վրաստանում սպասվում է միջինը 9,1 տոկոս գնաճ: 

Այս ցուցանիշը ուղիղ երկու անգամ գերազանցում է 2022 թվականի բյուջեի ներկայացման ժամանակ սահմանված կանխատեսմանը, ըստ որի՝ ենթադրվում էր միջինը 4,5 տոկոս գնաճ։

Սպասվածից ավելի բարձր գնաճով պայմանավորված՝ Վրաստանի Ազգային բանկը մարտի 30-ին բարձրացրել է վերաֆինանսավորման տոկոսադրույքը 0,5 տոկոսային կետով՝ հասցնելով 11 տոկոսի։

Նշենք, որ Վրաստանում տարեկան գնաճը հունվարին կազմել է 13,9 տոկոս, փետրվարին նվազել է մինչև 13,7 տոկոս, մարտին կրճատվել է 11,8 տոկոսի, իսկ ապրիլին դարձել է 12,8 տոկոս:

Հատկանշական է, որ ամենաշատը գներն աճել են սննդի (21 տոկոսով) և տրանսպորտի (22 տոկոսով) ոլորտներում:

Ազգային բանկի կանխատեսմամբ՝ 2022 թվականի երկրորդ եռամսյակում գնաճը միջինը կկազմի 10,5 տոկոս, երրորդ եռամսյակում այն ​​պետք է կրճատվի մինչև 7,85 տոկոս, իսկ չորրորդ եռամսյակում պետք է դառնա 7 տոկոս։

Ըստ այդմ, Ազգային բանկի տվյալներով՝ մինչև տարեվերջ գնաճի նվազում է կանխատեսվում։ 2023 թվականից գնաճի մակարդակը պետք է վերադառնա 5 տոկոսի, ապա՝ կանխատեսվող 3 տոկոսի։

Կարդացեք նաև՝

Վրաստանում տարեկան գնաճն ավելի բարձր է, քան Հայաստանում

Նախորդ իշխանության ժամանակ գնաճը կազմել է 14 տոկոս․ Ղարիբաշվիլի