Ապրիլի 2-ին տեղի ունեցավ Օզուրգեթիի հոգևոր, կրթամշակութային և երիտասարդական կենտրոնի բացման հանդիսավոր արարողությունը, որն իրականացրեց Վիրահայոց թեմի առաջնորդ Վազգեն եպիսկոպոս Միրզախանյանը։ Տեղեկությունը տարածում է Վրաստանում ՀՀ դեսպանությունը:
Կոմիտաս վարդապետի 150-ամյա հոբելյանի շրջանակներում նորաբաց կենտրոնը անվանակոչվեց Կոմիտաս վարդապետի անունով:
Մարտի 20-21-ին Գուրիայի տարածաշրջան և Աջարիայի ԻՀ կատարած աշխատանքային այցի ընթացքում Վրաստանում ՀՀ դեսպան Ռուբեն Սադոյանն այցելել էր Օզուրգեթիի երիտասարդական կենտրոն և ծանոթացել վերանորոգման աշխատանքներին։
Օզուրգեթիի կենտրոնը վարձակալել է Վիրահայոց թեմը, իսկ վերանորոգությունը կատարվել է Ջինիշյան հիշատակի հիմնադրամի միջոցներով: Վերջին տարիներին տեղի հոգևոր հովվության կողմից հիմնվել էր Սբ. Սահակ Պարթև մեկօրյա դպրոցը։
Սբ. Պատարագ մատուցելու համար կենտրոնի սրահում տեղադրվել է Խորան: Առաջիկայում կենտրոնում կհիմնվեն երգի և պարի խմբակներ:
