Եվրախորհրդի գլխավոր քարտուղար Ալեն Բերսեի խոսքով, Վրաստանի հետ ընթացող աշխատանքային միջավայրը լավագույնը չէ վերջին ամիսների համեմատ. ավելի վատ է, քան երկու-երեք ամիս առաջ։
ԵԽ գլխավոր քարտուղարն ընդգծել է. «Վրաստանում ունենք եվրոպական նկրտումներ ունեցող չորս միլիոն քաղաքացի, անշուշտ, պետք է նրանց կողքին լինենք»:
Բերսեն հայտարարել է՝ մտահոգված են Վրաստանում ցուցարարների նկատմամբ ոստիկանության գործողություններով։
«Մենք սերտորեն աշխատում ենք տարբեր կազմակերպությունների, Մարդու իրավունքների հանձնաժողովի, Եվրոպայի խորհրդի, Խոշտանգումների դեմ կոմիտեի հետ: Մենք կշարունակենք դա անել: Այն, որ այս պահին Խորհրդարանական վեհաժողովի անդամներ չեն («Վրացական երազանք»-ը հետ է կանչել պատվիրակությանը — հեղ), հուսով եմ մեզ չի խանգարի միջկառավարական համագործակցությանը», — ասել է Բերսեն։
Բերսեն դեկտեմբերին այցելել էր Թբիլիսի։ Դեկտեմբերի 20-ին այցն ամփոփող մամուլի ասուլիսում հայտարարել էր, որ «Վրացական երազանք»-ի ներկայացուցիչների հետ պայմանավորվել է այս հարցով աշխատանքային խումբ ստեղծելու մասին։ Սրան ի պատասխան` Կոբախիձեն մամուլի ասուլիսում հայտարարել էր, որ «կառավարությունը պատրաստ է նման քննարկումների, սակայն, ըստ նրա, անհրաժեշտ է ապացուցել օրենքի թերությունները»։
Այցի ընթացքում Բերսեն հանդիպել է նաև ընդդիմության և քաղաքացիական հասարակության ներկայացուցիչների, նաև 5-րդ նախագահ Սալոմե Զուրաբիշվիլիի հետ։
Ավելի ուշ Եվրախորհրդի կողմից հրապարակված նամակից պարզ դարձավ, որ «Վրացական երազանք»-ի վարչապետ Իրակլի Կոբախիձեն Եվրոպայի խորհրդի գլխավոր քարտուղարին մերժել է «գործակալների օրենք»-ի վերաբերյալ աշխատանքային խումբ ստեղծել:
Հունվարի վերջին Եվրախորհրդի խորհրդարանական վեհաժողովի (ԵԽԽՎ) կողմից քննադատական բանաձևի ընդունմանն ի պատասխան՝ «Վրացական երազանք»-ի ներկայացուցիչները հայտարարեցին, որ դադարեցնում են աշխատանքը ԵԽԽՎ-ում։
