Վրաստանի հաղորդակցության հանձնաժողովը եվրոպացի փորձագետների հետ համատեղ սկսել է աշխատել Վրաստանի հեռահաղորդակցության շուկայի լիարժեք հետազոտական նախագծի վրա։
Հանձնաժողովի համաձայն, նախագիծը ֆինանսավորվում է Եվրամիության կողմից՝ Եվրամիության և Վրաստանի միջև ասոցացման համաձայնագրի շրջանակներում։
Հետազոտության շրջանակներում կգնահատվի հեռահաղորդակցության շուկայում առկա մրցակցությունը, կորոշվեն համապատասխան շուկաները, անհրաժեշտության դեպքում, կսահմանվեն կոնկրետ պարտավորություններ ընկերությունների համար։ Ուսումնասիրության նպատակն է վերացնել ֆիքսված և շարժական կապի ծառայությունների շուկա մուտք գործելու խոչընդոտները և բարձրացնել մրցակցությունը:
«Սա մի կողմից կբերի տարբեր հեռահաղորդակցության ծառայությունների հասանելիությանը, իսկ մյուս կողմից՝ փոքր ընկերություններին հնարավորություն կտա զարգացնել իրենց գործունեությունը և ստեղծել այլընտրանքային կապի առաջարկներ, մինչդեռ ցանցի օպերատորներն ավելի լիարժեք կօգտագործեն հնարավորությունները, սեփական ցանցը՝ դրանով իսկ լրացուցիչ եկամուտ ստանալով»,- նշել են հանձնաժողովից։
Հեռահաղորդակցության շուկայում առկա իրավիճակի, մարտահրավերների և ապագա պլանների մասին տեղեկատվություն ստանալու համար փորձագետները հետազոտության շրջանակներում հանդիպել են Վրաստանում գործող հեռահաղորդակցության օպերատորների հետ:
Կախված հետազոտության բարդությունից և մասշտաբից՝ նախագիծը կիրականացվի մի քանի փուլով։ Առաջին փուլում կվերլուծվի ֆիքսված և շարժական կապի ծառայությունների մանրածախ շուկայի մրցակցային միջավայրը, որը կավարտվի 2023 թվականի առաջին կիսամյակում։ Երկրորդ փուլում կորոշվեն բջջային կապի շուկայում զգալի շուկայական հզորություն ունեցող օպերատորները, և նշված գործընթացը կավարտվի 2023 թվականի երկրորդ կիսամյակում:
