Վրաստանի 11-րդ գումարման չլեգիտիմացված խորհրդարանն այսօր՝ նոյեմբերի 28-ին, վստահություն հայտնեց կառավարությանը և կառավարության ծրագրին, որը կոչվում է «Միայն խաղաղությամբ, արժանապատվությամբ և բարօրությամբ դեպի Եվրոպա»։
Կառավարությանը վստահություն ստանալու համար անհրաժեշտ է չլեգիտիմացված խորհրդարանի ամբողջական կազմի մեծամասնության աջակցությունը։
Վարչապետի պաշտոնում կրկին Իրակլի Կոբախիձեի թեկնածությունն է ներկայացվել։ Չլեգիտիմացված նոր նախարարների կաբինետում կլինեն երեք նոր նախարարներ: Կառավարությունը չլեգիտիմացված խորհրդարան է ներկայացվել հետևյալ կազմով.
- Վարչապետ՝ Իրակլի Կոբախիձե,
- Արտաքին գործերի նախարար՝ Մակա Բոճորիշվիլի,
- Շրջակա միջավայրի պահպանության և գյուղատնտեսության նախարար Դավիթ Սոնղուլաշվիլի,
- Արդարադատության նախարար՝ Անրի Օխանաշվիլի,
- Կրթության, գիտության և երիտասարդության նախարար՝ Ալեքսանդրե Ծուլաձե,
- Էկոնոմիկայի և կայուն զարգացման նախարար՝ Լևան Դավիթաշվիլի,
- Պաշտպանության նախարար՝ Իրակլի Չիքովանի,
- Ներքին գործերի նախարար՝ Վախթանգ Գոմելաուրի,
- Մշակույթի և սպորտի նախարար՝ Թինաթին Ռուխաձե,
- Օկուպացված տարածքներից տեղահանվածների, աշխատանքի, առողջապահության և սոցիալական պաշտպանության նախարար Միխեիլ Սարջվելաձե,
- Ֆինանսների նախարար՝ Լաշա Խուցիշվիլի,
- Տարածաշրջանային զարգացման և ենթակառուցվածքների նախարար Իրակլի Քարսելաձե,
- Հաշտեցման և քաղաքացիական համագործակցության պետնախարար՝ Թեա Ախվլեդիանի:
Քաղհասարակությունը «Վրացական երազանք»-ի ձևավորած խորհրդարանը ինքնահռչակ է անվանում, սահմանադրագետները և իրավական հարցերով փորձագետները՝ հակասահմանադրական: Ըստ նրանց, հետագայում այս չլեգիտիմացված խորհրդարանի հաստատած կառավարությունը և նախագահի ընտրությունը ևս հակասահմանադրական են լինելու:
Վրաստանի նախագահ Սալոմե Զուրաբիշվիլին, նախ, խորհրդարանի նիստը հակասահմանադրական որակեց, իսկ ավելի ուշ` օրը «սև երկուշաբթի Վրաստանում»: Նախագահի գնահատմամբ՝ խորհրդարան այլևս գոյություն չունի:
