Վրաստանի բռնի տեղահանվածների գործակալությունը Թբիլիսիում, Բաթումիում և Քութայիսիում փախստականների համար բնակարաններ ձեռք կբերի:

Գործակալությունն արդեն բնակարանների գնման մրցույթ է  հայտարարել, որը կտևի մինչև հուլիսի 13-ը:  Մրցույթի հաղթողը 2 տարի կունենա` նոր բնակարանների կառուցման համար: Թբիլիսիում 1 քմ-ի համար գործակալությունը պատրաստ է 550 դոլար վճարել, շրջաններում` 470 դոլար: Ըստ մրցույթի պայմանների` շինարարը  պետք է ներկայացնի 1, 2, 3 և 4 սենյականոց բնակարաններ` համապատասխան մակերեսով: Բոլոր բնակարաններում`բացառությամբ մեկ սենյականոցները, պետք է լինեն առանձնացված ննջարաններ: Բոլոր բնակարանները հանձնվելու են ամբողջովին վերանորոգված, կահավորված խոհանոցով և սանհանգույցով:

Բնակարան կամ տուն ստանալու համար բռնի տեղահանվածները պետք է հատուկ հայտ լրացնեն: Դրանից հետո գործակալությունը նրանց բալեր կտա` 0-10` կախված նյութական վիճակից և նոր բնակարանի անհրաժեշտությունից, որից հետո հանձնաժողովը տեղում կուսումնասիրի  յուրաքանչյուր հայտատուի հարցը:

Նորակառույցներում բնակարաններ գնելուց և փախստականներին տրամադրելուց բացի, պետությունը նաև բարձրահարկ շենքերի ամբողջական թաղամասեր է կառուցում, գումար է տրամադրում` գյուղական համայքներում բնակարաններ ձեռք բերելու համար,  սեփականության իրավունքով փախստականներին է հանձնում համայնքային այն տարածքը, որտեղ տվյալ պահին նրանք բնակվում են կամ բնակարան են  վարձակալում:

Ներկայումս Վրաստանում բռնի տեղահանվածի կարգավիճակ ունի ավելի քան  286,8 հազար մարդ, սա ավելի քան  90,6 հազար ընտանիք է: մայրաքաղաքում ապրում է 37.800 նման ընտանիք: Պետությունը լուծում է  նրանց բնակապահովման հարցը, սակայն փախստականները ստիպված են լինում  տարիներով սպասել իրենց հերթին: