«Վրաստանը ճիշտ դիրքորոշում ունի ղարաբաղյան հակամարտության հարցում», — այս մասին «Կվիրիս պալիտրայի» հետ բացառիկ հարցազրույցում հայտարարել է Վրաստանում Թուրքիայի դեսպան Ֆաթմա Ջերեն Յազգանը: Նրա խոսքով՝ Վրաստանի իրավիճակը բավականին դժվար է, սակայն վերջինիս դիրքորոշումը չափազանց կարևոր է:
«Առաջիկա ընտրությունների պատճառով արտաքին քաղաքականությունը կարող է առաջնային չթվալ, բայց այս պահին Վրաստանի երկու հարևանները զինված հակամարտության մեջ են: Այս իրավիճակում շատ կարևոր է չանել այնպիսի գործողություններ, որոնք հակամարտության կողմերը կօգտագործեն միմյանց դեմ: Հավատում եմ, որ Վրաստանի արտաքին գործերի նախարարությունը և այլ համապատասխան գերատեսչությունները կձեռնարկեն բոլոր անհրաժեշտ միջոցառումները և ջանասիրաբար կմոտենան այս հարցին: Վրաստանը սկզբունքային դիրքորոշում ունի տարածքային ամբողջականության վերաբերյալ, և մենք պետք է հետևենք այս սկզբունքներին:
Կարծում եմ, որ Վրաստանը ճիշտ քաղաքականություն ունի այս հարցում.
1. նա միշտ արձանագրում է իր սկզբունքային դիրքորոշումը,
2. ձգտում է աշխատել միջազգային գործընկերների հետ` հակամարտությունը դադարեցնելու և տարածաշրջանում կայուն խաղաղություն հաստատելու համար,
3. արդար դիրքորոշում է, որ Վրաստանը չի ցանկանում օգտագործել իր տարածքը հավաքված գումարով զենք գնելու և տեղափոխելու համար:
Մենք հիանալի հարաբերություններ ունենք Վրաստանի հետ, քանի որ Թուրքիան միակ հարևան երկիրն է, որի հետ սահմանազատման խնդիր չունի Վրաստանը: Հայերն ու ադրբեջանցիները միասին ապրում են Վրաստանում, նրանք ունեն ընդհանուր բնակավայրեր, և մեզ համար շատ կարևոր է միասին ապրելու մշակույթը: Ցավալի է, որ թուրք-վրացական հարաբերությունների վերաբերյալ կեղծ ու տգեղ քարոզչություն է տարածվում երրորդ կողմից: Կարևորը՝ չնպաստենք այս քարոզչության տարածմանը: Օրինակ՝ Հայաստանի խորհրդարանի փոխնախագահ Լենա Նազարյանը ասաց, որ Հայաստանը Վրաստանի համար երաշխիք է, որ Թուրքիան չօկուպացնի Վրաստանը: Այստեղ մենք գործ ունենք նման փաստերի հետ: Վրաստանը պետք է դիմադրի նմանատիպ քարոզչությանը», — ասել է Ֆաթմա Ջերեն Յազգանը:
Թուրքիայի դեսպանը նույն հարցազրույցում նշել է, որ Թուրքիան Հարավային Կովկասում մշտական խաղաղություն է ուզում և չի պատրաստվում ներքաշվել ղարաբաղյան հակամարտության մեջ:
«Իմ ուղերձն այսպիսին է. Թուրքիան Ադրբեջանի եղբայրական երկիրն է, մենք կապված ենք ընդհանուր լեզվով, բայց մեր քաղաքականությունը օբյեկտիվ է և անկողմնակալ: Կրկնում եմ, տարածաշրջանում մեզ մշտական խաղաղություն է պետք: «Մենք» ասելով նկատի ունեմ ոչ միայն Թուրքիային, այլ նաև Վրաստանին, Ադրբեջանին և Հայաստանին», — նշել է Ֆաթմա Ջերեն Յազգանը:
