Կոռուպցիայի դեմ պայքարող պետությունների խումբը (GRECO) հրապարակել է Վրաստանի վերաբերյալ նոր զեկույց, որն անդրադարձել է երկրի խորհրդարանի անդամների, դատավորների և դատախազների առնչությամբ կոռուպցիայի կանխարգելմանը։
Փաստաթղթի համաձայն՝ Վրաստանը բավարար չափով կատարել է տրված 16 հանձնարարականներից 8-ը, 6-ը կատարվել են մասամբ, իսկ երկուսն ընդհանրապես չեն կատարվել։
Ըստ GRECO-ի՝ Վրաստանը չի բարեփոխել դատավորների անձեռնմխելիության հարցը, ըստ որի՝ նրանց ընդունած դատական որոշումների հետ կապված գործունեությունը պետք է սահմանափակվի («գործառական անձեռնմխելիություն»)։
Նաև չի կատարել հանձնարարականը, ըստ որի՝ «Հանրային հիմնարկներում շահերի բախման և կոռուպցիայի մասին» օրենքի համաձայն, գույքի հայտարարագիր ներկայացնող պաշտոնատար անձանց շրջանակը պետք է ընդլայնվի, իսկ գույքի հայտարարագրերը տարածվեն բոլոր դատախազների վրա։
Խորհրդարանի անդամներին GRECO-ն իր մտահոգությունն է հայտնել, որ համապատասխանության երկրորդ զեկույցը ստանալուց հետո մնացած առաջարկությունների իրականացման ուղղությամբ շոշափելի առաջընթաց չի գրանցվել: Իշխանությունները համապատասխան տեղեկություն չեն տրամադրել օրենքների նախագծերի վերաբերյալ հանրային խորհրդակցությունների ընթացակարգը կարգավորող միասնական նորմատիվ դաշտի մշակման վերաբերյալ։
Դատավորների մասով GRECO-ն գոհ է, որ Վերաքննիչ դատարանում դատավորների առաջխաղացման մրցութային ընթացակարգը համապատասխանում է իր առաջարկության պահանջներին:
Դրանից բացի, GRECO-ն ողջունում է «Ընդհանուր դատարանների մասին» օրենքում` Գերագույն դատարանում դատավորների նշանակման ընթացակարգին առնչվող փոփոխությունները:
Կազմակերպությունը մտահոգված է, որ անաչառությունը կարող է չապահովվել, երբ գործը քննում է Արդարադատության բարձրագույն խորհրդի նույն կազմը, և չկա հակափակուղային մեխանիզմ՝ կանխելու իրավիճակը, երբ որոշման համար պահանջվում է երկու երրորդ մեծամասնություն։
GRECO-ն նաև գոհունակություն է հայտնել, որ ընդունվել և հրապարակվել են Դատական էթիկայի նորացված կանոնները։ Իրավասու մարմինները կազմակերպել են նաև դասընթաց դատավորի էթիկայի նորացված կանոնների վերաբերյալ:
GRECO-ն ցավում է, որ «Հանրային հիմնարկներում շահերի բախման և կոռուպցիայի մասին» օրենքում փոփոխություններ կատարելու հարցում առաջընթաց չկա, շոշափելի առաջընթաց չկա նաև ունեցվածքի հայտարարագիր ներկայացնող պաշտոնյաների շրջանակի ընդլայնման հարցում։ Կազմակերպությունն իշխանություններին կոչ է անում ակտիվացնել իրենց ջանքերը համապատասխան օրենսդրական փոփոխությունների ընդունման ուղղությամբ, ըստ որոնց` բոլոր դատախազների համար պարտադիր կդառնա գույքի հայտարարագրի ներկայացումը։
