Վարչապետ Իրակլի Ղարիբաշվիլին այսօր հանդիպել է 4 երկրներում Վրաստանի նորանշանակ դեսպաններին։ Վրաստանը նոր դեսպաններ ունի Չինաստանում, Իսրայելում, Հորդանանում և Քուվեյթում։

Պաատա Կալանդաձեն նշանակվել է Չինաստանի Ժողովրդական Հանրապետությունում Վրաստանի արտակարգ և լիազոր դեսպան։ Կալանդաձեն մինչ այդ արտաքին գործերի նախարարությունում տարբեր պաշտոններ է զբաղեցրել, եղել է Վրաստանի արտակարգ և լիազոր դեսպանը Ղազախստանում ու Ղրղզստանում և Իսրայելում։ Մինչ Չինաստանում դեսպան նշանակվելը Կալանդաձեն Արաբական Միացյալ Էմիրություններում Վրաստանի դեսպանն էր։

Իսրայելում Վրաստանի դեսպանի պաշտոնում Լաշա Ժվանիային կփոխարինի Զազա Կանդելակին։ Վրաստանի կառավարության տվյալներով՝ Կանդելակին պետական ​​ծառայության երկարամյա փորձ ունի։ Տարբեր ժամանակներում աշխատել է Գիտությունների ակադեմիայում, Թբիլիսիի պետական ​​թանգարանում, եղել է Վրաստանի 4-րդ գումարման խորհրդարանի պատգամավոր, աշխատել է արտաքին գործերի նախարարության տարբեր պաշտոններում։

Արչիլ Ձուլիաշվիլին նշանակվել է Հորդանանի, Լիբիայի և Իրաքի նոր դեսպան։ Մինչ այդ նա զբաղեցնում էր Հնդկաստանում Վրաստանի դեսպանի պաշտոնը։

Նոշրևան Լոմթաթիձեն նշանակվել է Քուվեյթում Վրաստանի դեսպան։ 2021 թվականի հունիսից մինչ այժմ նա աշխատում էր որպես Վրաստանի արտաքին գործերի նախարարության միջազգային տնտեսական կապերի դեպարտամենտի տնօրեն։