«Չեմ աջակցում համամասնական համակարգին անցնելուն: 2021 կամ 2022 թվականին անպայման արտահերթ ընտրություններ կլինեն»,- այս մասին «Վրացական երազանքի» մեծամասնական պատգամավոր Կախա Օքրիաշվիլին հայտարարել է լրագրողների հետ զրույցում՝ մեկնաբանելով համամասնական ընտրական համակարգին անցնելու սահմանադրական փոփոխությունները:
Օքրիաշվիլին հույս է հայտնել, որ խորհրդարանական մեծամասնությունում 30-40 մեծամասնական պատգամավոր կլինի, ովքեր չեն աջակցի սահմանադրական փոփոխությունների նախագծին, ինչը կձախողվի:
Նրա խոսքով գործնականորեն ոչ մի մեծամասնական պատգամավոր չի աջակցում փոփոխություններին, սակայն օրինագծին հնարավոր է կողմ քվեարկեն ելնելով թիմային խաղի կանոններից:
«Ես նույնպես թիմային խաղացող եմ, սակայն լուրջ հարցերում լսում եմ միայն իմ մտքին ու սրտին: Իմ որոշումը չի փոխվել, հույս ունեմ 30-40 մեծամասնական կողմ չի քվեարկի և օրինագիծը կձախողվի»,- հայտարարել է Օքրիաշվիլին:
Հիշեցնենք՝ այսօր խորհրդարանում մեկնարկում են համամասնական համակարգին անցնելու շուրջ քննարկումները:
