Միացյալ Թագավորության Եվրոպայի, Հյուսիսային Ամերիկայի և անդրծովյան տարածքների պետնախարար Սթիվեն Դաութը հեռախոսազրույց է ունեցել Վրաստանի իշխող «Վրացական երազանք»-ի արտաքին գործերի (ԱԳ) նախարար Մակա Բոճորիշվիլիի հետ:
Դաութը X-ում տարածած հայտարարության մեջ Բոճորիշվիլիին անվանել է «Վրացական երազանք»-ի ներկայացուցիչ, ոչ թե ԱԳ նախարար։ Պետնախարարը գրել է, որ Բոճորիշվիլիի հետ զրույցում ևս մեկ անգամ ընդգծել է, որ բռնությունն ու ոստիկանության կողմից անօրինական ու կամայական ձերբակալություններն անընդունելի են։
«Խոսելով «Վրացական երազանք»-ի ներկայացուցիչ Մակա Բոճորիշվիլիի հետ՝ այսօր ևս մեկ անգամ ընդգծեցի, որ անընդունելի են բռնությունները և ոստիկանության կողմից անօրինական ու կամայական ձերբակալությունները։ Մեծ Բրիտանիան կդիտարկի բոլոր հնարավորությունները՝ պատասխանատու անձանց պատասխանատվության ենթարկելու համար», — գրել է Դաութը:
Վրաստանի ԱԳՆ-ի տարածած հաղորդագրության մեջ հեռախոսազրույցն այլ կերպ է ներկայացված: Մասնավորապես, Դաութի հայտարարության մասին ոչինչ չի ասվում:
«Միացյալ Թագավորության պետնախարարը ևս մեկ անգամ հայտնել է Միացյալ Թագավորության դիրքորոշումն ու մտահոգությունները Վրաստանում ընթացող գործընթացների վերաբերյալ։ Վրաստանի արտաքին գործերի նախարարն իր հերթին պետնախարարին տեղեկացրել է զրույցի ընթացքում բարձրացված հարցերի մասին և իր սրտի ցավը հայտնել Վրաստանի առնչությամբ Միացյալ Թագավորության ընդունած որոշումների առնչությամբ, որը ներառում է ռազմավարական երկխոսության ձևաչափի հաջորդ փուլի հետաձգում և երկրին ծրագրային աջակցության կասեցում», — նշված է Վրաստանի ԱԳՆ-ի հաղորդագրության մեջ:
Հաղորդագրության մեջ նաև ասված է. «Մակա Բոճորիշվիլին ընդգծել է, որ հատկապես կարևոր է Վրաստանում ընթացող գործընթացների օբյեկտիվ և անաչառ գնահատումը։ Նա խոսել է նաև Վրաստանում կայացած խորհրդարանական ընտրությունների, դրանց արդյունքների և քաղաքական շահարկումների մասին, որոնք շարունակվում են նաև այսօր ընդդիմության կողմից։ Զրույցն անդրադարձել է նաև երկրում ընթացող բողոքի ցույցերին, որոնց ընթացքում ևս մեկ անգամ նշվել է խաղաղ և օրինապահ գործողությունների անհրաժեշտությունը, վրացական կողմը բրիտանական կողմին տեղեկություններ է տրամադրել գործողությունների ընթացքում նկատված օրենքի խախտումներին պետության արձագանքի մասին»։ .
