Վրաստանի չլեգիտիմացված կառավարությունը ներքին գործերի նախարարության (ՆԳՆ) 11 բարձրաստիճան պաշտոնյաների կառաջադրի «Արժանիքի շքանշան»-ի։ Կառավարության շենքում կայացած ճեպազրույցում դրա մասին հայտարարել է «Վրացական երազանք»-ի վարչապետ Իրակլի Կոբախիձեն։
Առաջադրված բարձրաստիճան ոստիկանների թվում են եվրոպամետ հանրահավաքների ցրմանը մասնակցած անձինք, նաև` ԱՄՆ-ի, Մեծ Բրիտանիայի և եվրոպական մի շարք երկրների կողմից պատժամիջոցների ենթարկվածները։
Կոբախիձեի խոսքով, պետական մրցանակին հավակնում են`
- ՆԳ նախարար, չլեգիտիմացված փոխվարչապետ Վախթանգ Գոմելաուրին,
- ՆԳ նախարարի առաջին տեղակալ Շալվա Բեդոիձեն,
- ՆԳ փոխնախարար Ալեքսանդրե Դարախվելիձեն,
- ՆԳ փոխնախարար Գիորգի Բութխուզին,
- ՆԳ փոխնախարար Իոսեբ Ճելիձեն,
- ՆԳՆ Կենտրոնական քրեական ոստիկանության վարչության տնօրեն Թեմուր Կուպատաձեն,
- ՆԳՆ պարեկային ոստիկանության վարչության տնօրեն Վաժա Սիրաձեն,
- Թբիլիսիի ոստիկանության վարչության տնօրեն Սուլխան Թամազաշվիլին,
- Հատուկ առաջադրանքների վարչության տնօրեն Զվիադ Խարազիշվիլին,
- Հատուկ առաջադրանքների վարչության փոխտնօրեններ Միլլերի Լագազաուրին և Միրզա Կերզևաձեն։
Ի դեպ, պետական բարձրագույն պարգևը կարող է շնորհել միայն նախագահը։ Կոբախիձեն ասել է, որ իրենք կսպասեն նոր նախագահի երդմնակալությանը։
«Վրացական երազանք»-ի վարչապետ Կոբախիձեն նաև ասել է, որ եթե պատժամիջոցների պատճառով որևէ պաշտոնյա ֆինանսական կորուստ ունենա, «պետությունը կփոխհատուցի նրան»։
«Վրացական երազանք»-ի կառավարության դեմ միջազգային պատժամիջոցների կիրառումը սկսվել է 2023 թվականին և ակտիվացել 2024 թվականին։
