Վրաստանի նախկին վարչապետ, այժմ ընդդիմադիր Գիորգի Գախարիայի «Վրաստանի համար» կուսակցությունն արձագանքել է ճապոնական լրատվամիջոցի հոդվածին, ըստ որի՝ Վրաստանի դեսպանը Տոկիոյում հանդիպել է «Վրացական երազանք»-ի հիմնադիր և պատվավոր նախագահ, օլիգարխ Բիձինա Իվանիշվիլիի որդուն՝ Ուտա Իվանիշվիլիին և նրան «ճամպրուկ» հանձնել:

«Վրաստանի համար»-ը նշում է՝ լրագրողական հետաքննությունը հիմնավոր կասկածներ է հարուցում, որ Վրաստանի դիվանագիտական ​​ծառայությունը և դիվանագետները ներգրավված են Իվանիշվիլիի և նրա ընտանիքի անձնական շահերի սպասարկման մեջ:

«Կա նաև հիմնավոր կասկած, որ կա դիվանագիտական ​​փոստի և դիվանագիտական ​​անձեռնմխելիության օգտագործում անձնական նպատակներով։ Հավանաբար փոստն օգտագործվում է պատժամիջոցներից խուսափելու և սև փողեր փոխանցելու համար», —  հրապարակված հայտարարության մեջ գրել է կուսակցությունը:

Ըստ «Վրաստանի համար»-ի՝ սա ոչ միայն վրացական օրենսդրության, այլև միջազգային կոնվենցիաների կոպիտ խախտում է, և կարող է մեծ դիվանագիտական ​​սկանդալ առաջանալ:

Ի դեպ, փետրվարի 6-ին ճապոնական «Բունշուն» (Shūkan Bunshun) լրատվամիջոցը հոդված է հրապարակել, ըստ որի՝ Ճապոնիայում Վրաստանի դեսպան Թեիմուրազ Լեժավան Տոկիոյում Ուտա Իվանիշվիլիին սև ճամպրուկը փոխանցելիս ասել է. «Այստեղ մի՛ բացիր: Հուսով եմ, որ կօգնի»:

«Բունշուն»-ը գրել է նաև, որ անշարժ գույքի ռեեստրից ստացված տեղեկատվության համաձայն՝ Ուտա Իվանիշվիլին 2024 թվականի հունիսին Տոկիոյի շքեղ շենքերից մեկում բնակարան է գնել, որի շուկայական գինը գնման պահին եղել է 500-550 միլիոն ճապոնական իեն (3,28-3,6 մլն ԱՄՆ դոլարի միջակայքում գտնվող գումար է):

«Բունշուն»-ը հրապարակել նաև լուսանկարներ, թեև դրանցում երևում է միայն Թեիմուրազ Լեժավայի դեմքը։ Ենթադրաբար, Ուտա Իվանիշվիլիի դեմքը ծածկված է։