Վրաստանի «Սոցիալական արդարության կենտրոն»-ը (SJC) արձագանքել է ԶԼՄ-ների ներկայացուցիչների նկատմամբ բռնությանը և Հատուկ քննչական ծառայությանը կոչ արել անհապաղ արձագանքել հանցագործությանը։

SJC-ն նշել է՝ այսօր՝ փետրվարի 4-ին, ԶԼՄ-ների ներկայացուցիչները խորհրդարանի հարակից տարածքում իրենց մասնագիտական ​​պարտականություններն էին կատարում՝ ի պաշտպանություն «Բաթումելեբի» և «Նեթգազեթի» լրատվամիջոցների հիմնադիր Մզիա Ամաղլոբելիի` պահանջելով նրան ազատ արձակել, և ոստիկանները նրանց ֆիզիկական բռնության ենթարկեցին։

«Ըստ տեղեկությունների՝ սկզբում ոստիկանությունը ցուցարարներին կոչ է արել շարժվել դեպի մայթ, ինչը բոլորը կատարել են։ Դրանից հետո ոստիկանները սկսել են ծեծել ցուցարարներին ու հրմշտոց ստեղծել։ Ներքին գործերի նախարարությունը ձերբակալել է բողոքի ակցիայի երկու մասնակիցների, որոնցից մեկի ձերբակալության տեսագրությունը հրապարակվել է։

Ոստիկանները հարձակվել են NEWS.On.ge-ի գլխավոր խմբագիր Վանցենտ Խաբեիշվիլիի վրա բողոքի ակցիայի ժամանակ։ Պարտականությունները կատարելիս նա ուժեղ հարված է ստացել գլխին և տապալվել գետնին, ինչի պատճառով նրան հիվանդանոց են տեղափոխել։ Դեպքի վայրում ոստիկանները նաև հարձակվել են հանրային ֆոտոլրագրող Նաթիա Լևերաշվիլիի և այլ լրագրողների վրա: Հրապարակված տեսանյութում երևում է, որ իրավապահները բռնության ժամանակ սև դիմակներ են կրում, թեև նրանց դեմքերը ամբողջությամբ ծածկված չեն, ինչը հնարավորություն է տալիս նույնականացման», — նշել է SJC-ն:

Ըստ կազմակերպության՝ լրատվամիջոցների ներկայացուցիչների նկատմամբ ֆիզիկական բռնությունը միակ միջադեպը չէ` հատկապես 2024 թվականի նոյեմբերի 28-ին սկսված բողոքի ցույցերի ժամանակ դա դարձել է հաստատված պրակտիկա։ Լրագրողների նկատմամբ իրականացվող սիստեմատիկ հետապնդումներին և բռնություններին մասնակցել են ոչ միայն իրավապահ մարմինները, այլև մասնավոր բռնարար խմբերը։

«Լրագրողների վրա թիրախավորված հարձակումների հաճախականությունը, մասշտաբը և բնույթը, նաև հանցագործների սիստեմատիկ անպատժելիությունը հստակ ցույց են տալիս, որ լրատվամիջոցները դարձել են «Վրացական երազանք-ի» թիրախը, և նրանց վրա հարձակվելով՝ ռեժիմը պայքարում է բոլոր քննադատական ​​ձայների դեմ, որոնք բացահայտում են իշխանության դաժանությունը։ Միայն 2024 թվականին գրանցվել է լրատվամիջոցների ներկայացուցիչների նկատմամբ հայհոյախառն և ֆիզիկական բռնության, նաև ահաբեկման տարբեր ձևերի և նրանց լռեցնելու փորձերի մոտ 200 դեպք, որոնց 80 տոկոսը՝ հոկտեմբերի վերջից մինչև դեկտեմբերի վերջը։ 2024 թվականին լրագրողների նկատմամբ բռնության դեպքերը հրապարակայնորեն կատարվել են գրեթե 5 անգամ ավելի, քան 2023 թվականին», — հավելել է «Սոցիալական արդարության կենտրոն»-ը:

SJC-ն ևս մեկ անգամ համերաշխություն է հայտնել քննադատական ​​և ազատ լրատվամիջոցներին, և հաշվի առնելով այն հանգամանքը, որ հնարավոր է բռնության մեջ ներգրավված իրավապահների ինքնությունը հեշտությամբ պարզել հրապարակայնորեն հրապարակված տեսագրություններից, Հատուկ քննչական ծառայությանը կոչ է արել.

• Բողոքի մասնակիցների նկատմամբ բռնության, պաշտոնեական լիազորությունների չարաշահման, լրագրողների մասնագիտական ​​գործունեությանն ապօրինի միջամտության փաստերով հետաքննություն սկսել:
• Տեղեկատվություն տարածել ցուցարարների կալանավորման հիմքերի մասին և անհապաղ ազատ արձակել ապօրինի ձերբակալվածներին:
• Ապահովել, որ հանրությունը տեղեկացված լինի լրագրողների նկատմամբ շարունակվող բռնության դեպքերով իրականացվող քննչական գործողությունների մասին։