ԱՄՆ Պետդեպարտամենտի խոսնակ Մեթյու Միլլերն արձագանքել է Վրաստանում տեղի ունեցող իրադարձություններին և նշել՝ ԱՄՆ-ը կանգնած է վրաց ժողովրդի կողքին։
Միլլերն ընդգծել է՝ ԱՄՆ-ը հստակ ասել է, որ անհանգստացած է այն քայլերի կապակցությամբ, որ Վրաստանի իշխող «Վրացական երազանք»-ն իրականացնում է Եվրոպայի հետ ինտեգրման ճանապարհին։
«Ինչպես գիտեք, մենք այս հարթակից պատժամիջոցների մասին նախապես չենք հայտարարում, բայց երբ պատժամիջոցների կարիք է առաջանում, մենք դա անում ենք: Դուք արդեն տեսել եք, որ մենք պատժամիջոցներ ենք կիրառել Վրաստանի կառավարության ներկայացուցիչների նկատմամբ, վիզային սահմանափակումներ ենք մտցրել, այլ միջոցներ ենք ձեռնարկել, կասեցրել ենք Վրաստանի կառավարությանը հատկացվելիք 95 միլիոն դոլարը»,- ասել է Միլլերը։
Ամերիկայի Միացյալ Նահանգները դադարեցրել է ռազմավարական գործընկերությունը Վրաստանի հետ:
ԱՄՆ Պետդեպարտամենտի հայտարարության մեջ գրված է՝ Վրաստանի իշխող «Վրացական երազանք» կուսակցությունը, դադարեցնելով Վրաստանի Եվրամիությանն անդամակցելու գործընթացը, մերժեց Եվրոպայի հետ սերտ կապերի հնարավորությունը և Վրաստանն ավելի խոցելի դարձրեց Կրեմլի համար:
