Ապրիլի 10-12-ին նշվում է մահմեդական աշխարհի ամենամեծ տոներից մեկը՝ Ռամադան-Բայրամը։ Ռամադանի տոնը նշում են նաև Վրաստանի մահմեդականները, որի կապակցությամբ Վրաստանի Կրոնի հարցերով պետական գործակալությունը շնորհավորական ուղերձ է տարածել։
Վրաստանի վարչապետ Իրակլի Կոբախիձեն, իր հերթին, այցելել է Թբիլիսիի Ջումա մզկիթ և շնորհավորել մահմեդական համայնքին տոնի առթիվ։ Վարչապետն ընդգծել է՝ Վրաստանում քրիստոնյաների և մահմեդականների դարավոր պատմական հարաբերությունները։
«Դարեր շարունակ միասին աշխատել ենք, միասին պայքարել մեր ընդհանուր հայրենիքի բարօրության, առաջընթացի ու զարգացման համար։ Սա այն հարաբերություններն է, որոնց նկատմամբ մենք շատ ուշադիր ենք և զգույշ ենք լինելու նաև ապագայում»,- նշել է Կոբախիձեն։
Կրոնի հարցերով պետական գործակալության նախագահ Զազա Վաշակղմաձեի խոսքերով, պետության և նրա առաջին դեմքի ուշադրությունը մուսուլմանների նկատմամբ առանձնահատուկ է, և դա զգում է նաև մահմեդական համայնքը։
