Օրենսգրքում փոփոխություն մտցնելու մասին նախաձեռնությունը խորհրդարանում ներկայացվել է ապրիլի 26-ին, առաջին ընթերցումը տեղի է ունեցել ապրիլի 28-ին, ինչից հետո հանձնաժողովը մեղմացրել է նախնական տարբերակը: Նախագիծն ընդունվել է ապրիլի 29-ին` 72 կողմ ձայնով: Լսման ժամանակ ներկա չեն գտնվել ընդդիմության այն ներկայացուցիչները, որոնք նախապես ստորագրել էին ընդդիմության և իշխանության հաշտեցման փաստաթուղթը: Ընթերցմանը ներկա է եղել «Լելո» կուսակցության անդամ Անա Նացվլիշվիլին, ով նախագիծը բնութագրել է` «Վրացական երազանքը վախենում է օրենքից»:

Ի՞նչ է փոխվել օրենքում

Օրենսգրքի 166-րդ հոդվածում ավելացվել է երկրորդ մաս, որով սահմանվում է, որ մանր խուլիգանություն իրականացնելուց ու տուգանվելուց հետո, կրկնակի անգամ նույն արարքի համար իրավախախտը պետք է վճարի 1500-2000 լարի, կամ ենթարկվի 5-15 օրյա կալանքի։

Մինչ այս գործող օրենքի համաձայն, այս գումարը կազմում էր 500-1000 լարի, կամ մինչև 15 օրյա կալանք, որը հնարավոր էր փոխարինվել 5 օրվա, այսինքն նվազագույն շեմ սահմանված չէր:

173-րդ հոդված

Նոր խմբագրված տարբերակով սահմանված է, որ իրավապահ մարմիններին կամ իր աշխատանքը կատարող որևէ այլ պետծառայողին վիրավորելու կամ չենթարկվելու դեպքում առաջին անգամ տուգանք է սահմանվում 2000-3000 լարիի չափով կամ մինչև 15-օրյա կալանքով: Նույն «հանցանքը» երկրորդ անգամ կրկնելու դեպքում տուգանքը կազմում է 3500-4500 լարիի չափով կամ 7-15 օր կալանքով:

Մինչ այս գործող տուգանքը 1000-4000 լարի էր կամ վարչական կալանք մինչև 15 օր:

247-րդ հոդված

«Վարչական կալանքի դեպքում, բերման ենթարկված անձը կարող է դատարան ներկայանալ կալանքի պահից ոչ ուշ քան 24 ժամվա ընթացքում»,- ասվում է օրենքի փոփոխված տարբերակում։

Նախկինում այս արտահայտությունը հետևյալ կերպ էր ձևակերպված՝ վարչական իրավախախտի կալանավորման ժամկետը չպետք է 12 ժամից ավելի լիներ, չնայած հոդվածի երկրորդ կետը պարզաբանում էր, որ ոչ աշխատանքային ժամերը հաշված ընդհանուր առմամբ ժամկետը չպետք է գերազանցեր 48 ժամը:

Նշված փոփոխությունների հետ կապված սուր քննարկումներ են սկսվել քաղաքական դաշտում` ինչպես Վրաստանի ներսում, այնպես էլ՝ Վրաստանից դուրս: Արձագանքել է նաև ԱՄՆ-ն` կոչ անելով վերանայել կայացրած որոշումը: Առանձին պատգամավորներ կոչ են անում նախագահին վետո դնել օրենքի վրա: Հասարակական կազմակերպություններն իրենց հերթին հայտարարություններ են տարածել առ այն, որ նման խիստ քայլերն անընդունելի են:

Այս հրապարակումը ստեղծվել է ԵՄ-ի աջակցությամբ: Նյութի բովանդակության համար ամբողջովին պատասխանատու է Ալիք Մեդիան, այն կարող է չհամընկնել ԵՄ֊ի հայացքների հետ։