Թբիլիսիի քաղաքային դատարանը Վակեի այգում տեղի ունեցած ողբերգության գործով ձերբակալված 9 անձի նկատմամբ որպես խափանման միջոց է ընտրել ազատազրկումը. որոշումը կայացրել է դատավոր Միխեիլ Ջինջոլիան։
Փաստաբանները պահանջել են դատարանի դահլիճից ազատ արձակել ամբաստանյալներին կամ որպես այլընտրանք՝ կրառել գրավը: Պաշտպանական կողմը կբողոքարկի որոշումը։
Նշենք, որ Վակեի այգում տեղի ունեցած ողբերգության գործով իրավապահները հոկտեմբերի 18-ին ձերբակալել են 9 հոգու։
Հիշեցնենք՝ հոկտեմբերի 13-ի առավոտյան Թբիլիսիի Վակեի այգում՝ մուտքի մոտ, շատրվանների ավազան մտած երեխաները հոսանքահարվել են: Ավելի ուշ հայտնի դարձավ, որ հոսանքահարվելու հետևանքով վիրավորված 13-ամյա աղջիկը կլինիկայում մահացել է:
Հոսանքահարվելու հետևանքով դեռահասի մահից հետո քաղաքացիները հավաքվել են Թբիլիսիի քաղաքապետարանի մոտ և ցույց ու մոմավառություն կազմակերպել:
Ցավալի լուրին արձագանքել են Վրաստանի վարչապետ Իրակլի Ղարիբաշվիլին, Վրաստանի նախագահ Սալոմե Զուրաբիշվիլին, Թբիլիսիի քաղաքապետ Կախա Կալաձեն, ԿԳ նախարար Միխեիլ Չխենկելին, ընդդիմադիր, քաղաքական և փորձագիտական շրջանակները:
Համայն Վրաստանի կաթողիկոս-պատրիարք Իլիա II-ը ցավակցական հեռագիր է հղել Թբիլիսիի Վակեի այգում տեղի ունեցած ողբերգության կապակցությամբ։
Հարկ է նշել, որ Վակեի այգու վերանորոգված շատրվանների հանդիսավոր բացումը տեղի է ունեցել հոկտեմբերի 12-ին: Այգու շատրվանների վրա «Գրինսերվիս+» ընկերությունը 13 մլն լարիի վերականգնողական աշխատանքներ է կատարել։ Մրցութային փաստաթղթերի համաձայն՝ ավարտված աշխատանքների վերջին ստուգումն իրականացվել է 2022 թվականի օգոստոսի 29-ին։
Վրաստանի ներքին գործերի նախարարությունը հետաքննություն է սկսել Քրեական օրենսգրքի 240-րդ հոդվածի 1-ին մասով, որը վերաբերում է անվտանգության կանոնների խախտմանը, ինչը հանգեցրել է առողջությանը նվազ ծանր կամ ծանր վնասի։
