«Թբիլիսոբա»-ի տոնակատարության համար այս տարի կծախսվի 3,5 մլն լարի։ Միջոցառումների կազմակերպման հարցով Թբիլիսիի քաղաքապետարանն արդեն դիմել է Գնումների գործակալությանը, գրել է bm.ge-ն։

«Թբիլիսոբա»-ն կնշվի հոկտեմբերի առաջին շաբաթավերջին երկու օր՝ 5-ին և 6-ին։ Տոնական բյուջեն, նախորդ տարվա համեմատ, 400 հազարով ավելի է։ Քաղաքապետարանը պետական ​​գերատեսչությանը խնդրել է, որ բոլոր գնումները կատարվեն պարզեցված ընթացակարգով։ Նույն պրակտիկան կար նախորդ տարիներին։

Տոնական միջոցառումներ տեղի կունենան Օրբելիանիի հրապարակի տարածքում և «Ռիկղե» այգում։ Այնտեղ կներկայացվեն տարբեր ինստալացիաներ և դեկորացիաներ, ֆոտոգոտիներ, սպորտային և մշակութային տարածքներ, ցուցահանդեսային տաղավարներ։ Կլինեն տարբեր ժանրերի կատարողների ելույթներ, թատերական ներկայացումներ, ժամանցային միջոցառումներ, «զրույցներ բակերում»։

«Թբիլիսոբա»-ի շրջանակներում կանցկացվեն նաև «Քաղցրավենիքի փառատոն», «Taste Tbilisi» սննդի փողոցային շուկա և այլ գաստրոնոմիական տոնավաճառներ։

«Թբիլիսոբա»-ն աշնանային տոն է Վրաստանի մայրաքաղաքում, առնչվում է բերքահավաքին։ Տոնը նշվում է 1979 թվականից։