Թբիլիսիում «գործակալների մասին օրենքի» դեմ բողոքի ցույցը մեկնարկել է: «Ալիք Մեդիա Վրաստան»-ի փոխանցմամբ՝ այս պահին տարբեր բուհերի ուսանողներ հավաքվել են Ֆիլհարմոնիայի հարակից տարածքում և երթով շարժվում են դեպի Հերոսների հրապարակ:
Միևնույն ժամանակ Թբիլիսիի պետական համալսարանի (ԹՊՀ) ուսանողները հավաքվել են Ռուսթավելիի պողոտայում՝ խորհրդարանի մոտ։ Նրանք երթով դեպի օրենսդիր մարմին են շարժվել ԹՊՀ-ի առաջին մասնաշենքից:
Ռուսթավելիի պողոտայում երթևեկությունը կաթվածահար է:
Խորհրդարանի մոտ այս պահին իրավիճակը հանգիստ է: «Ռուսական օրենքին» դեմ արտահայտվողներն ասում են, որ իրենց ընտրությունը Արևմուտքն է, և իրենք թույլ չեն տա, որ որևէ մեկը երկիրը տանի դեպի Ռուսաստան։
Իշխող «Վրացական երազանքը» երրորդ ընթերցմամբ ընդունել է «ռուսական օրենքը»՝ հանրային լայնածավալ բողոքի ակցիաների և արևմտյան գործընկերների քննադատության ֆոնին։ Վրաստանի խորհրդարանը «գործակալների մասին օրենքն» ուղարկել է նախագահ Սալոմե Զուրաբիշվիլիի ստորագրությանը: Հայտնի է, որ Զուրաբիշվիլին մտադիր է վետո դնել այս օրենքի վրա։
