Այսօր՝ սեպտեմբերի 3-ի ժամը 13:00-ի սահմաններում, Թբիլիսիի Փեյքրեբիի փողոցի մոտ երկհարկանի Stadler գնացքը վրաերթի է ենթարկել երկու մարդու։
Ժամը 13:10-ից գնացքը կանգ է առել, բայց ուղևորները որոշ ժամանակ չեն կարողացել դուրս գալ վագոններից։ Դեպքը տեղի է ունեցել այն պահին, երբ գնացքը մտել է Թբիլիսի` մոտավորապես Դիդուբեի տարածքում։
Վթարի վայրում երկու դի է հայտնաբերվել։
Ավելի ուշ «Վրաստանի երկաթուղիներ»-ը հայտարարություն է տարածել, ըստ որի` գնացքի բախման հետևանքով զոհերը երկաթուղու աշխատակիցներ էին։
«Դիդուբե-Ավճալա հատվածում տեղի ունեցած երկաթուղային վթարի հետևանքով մահացել են Վրաստանի երկաթուղու երկու աշխատակիցներ, որոնք կատարում էին պլանային աշխատանքներ»,- ասված է հաղորդագրությունում։ Նույն հաղորդման համաձայն՝ գնացքի ուղևորները չեն տուժել։
«Վրաստանի երկաթուղիներ»-ը հայտնել է, որ դեպքի մանրամասն հետաքննություն է ընթանում, դեպքի վայրում կատարվում են քննչական գործողություններ, նաև ցավակցել են հանգուցյալների ընտանիքներին։
