«Բացե՛ք երկիրը, բացե՛ք տնտեսությունը»,- այս վանկարկումներով այսօր Վրաստանի կառավարության շենքի դիմաց անցկացվել է հերթական բողոքի ակցիան՝ ընդդեմ կորոնավիրուսի դեմ սահմանված սահմանափակումների:
Ակցիայի մասնակիցները կառավարությանը կոչ են անում տեսնել և գիտակցել «լոքդաունի» պատճառով ստեղծված խնդիրները և ժամանակին ընդունել որոշում սահմանափակումների մեղմացման մասին:
Ակցիային մասնակցել են տարբեր ոլորտների՝ օրինակ հյուրանոցային բիզնեսի, ձմեռային հանգստավայրերի, ֆիթնես ակումբների, ռեստորանների և այլ բնագավառի ներկայացուցիչներ:
Վերջիններս կառավարությունից պահանջում են՝
- Վերացնել ձմեռային հանգստավայրերի սահմանափակումները,
- Ուսումնական պրոցեսը շարունակել դասասենյակներում և բացել մանկապարտեզները համապատասխան կանոնակարգերով,
- Վերականգնել հասարակական և միջքաղաքային տրանսպորտի աշխատանքը,
- Բացել ռեստորաններն ու սրճարանները համապատասխան կանոնակարգերի պահպանմամբ,
- Բացել ֆիթնես և սպորտային դահլիճները,
- Բացել արվեստի կենտրոնները և անհատական մոտեցմամբ մշակել համապատասխան կանոնակարգեր,
- Չեղարկել «պարետային ժամը»:
Հիշեցնենք՝ նախորդ շաբաթվանից գրեթե ամեն օր կառավարության շենքի դիմաց տարբեր խմբերի և հասարակական կազմակերպությունների կողմից բողոքի ակցիաներ են անցկացվում ընդդեմ կորոնավիրուսի դեմ սահմանված արգելքների:
