Ռուս-վրացական օգոստոսյան պատերազմի հետ կապված Վրաստանի դեմ հարուցված 3 300 գործերից բացառապես բոլորն ավարտվել են Վրաստանի հաղթանակով, accentnews.ge լրատվականի փոխանցմամբ՝ խորհրդարանում հայտարարել է արդարադատության նախարար Ռատի Բրեգաձեն:
Ըստ նրա՝ միջազգային դատարաններում պետական շահերի պաշտպանությունը Արդարադատության նախարարության կարևորագույն գործառույթներից է։
«Այս ուղղությամբ մենք իսկապես հպարտանալու շատ բան ունենք, ոչ միայն արդարադատության նախարարությունը, այլ՝ ամբողջ պետությունը։ Մասնավորապես, նույն օգոստոսյան պատերազմի հետ կապված Վրաստանի դեմ հարուցված 3300 գործերից բացարձակապես բոլոր գործերն ավարտվել են Վրաստանի հաղթանակով։ Ուզում եմ ևս մեկ անգամ շնորհավորել բոլորիդ այս մեծ հաղթանակի կապակցությամբ, որը ձեռք է բերվելու «Վրացական երազանքի» իշխանության օրոք օկուպացիայի հարցում»,- ասել է նախարարը:
Նրա խոսքով, 2023 թվականի ապրիլի 28-ին Ռուսաստանը պարտավորվել է վճարել մինչև 130 միլիոն եվրո՝ ի նպաստ 2008 թվականի պատերազմից տուժած Վրաստանի մինչև 24 հազար քաղաքացիների. «2023 թվականի ապրիլի 20-ին Ստրասբուրգի դատարանը լիովին ընդունելի ճանաչեց Ռուսաստանի դեմ ներկայացված շարունակման օկուպացիայի գործով միջպետական բողոքը…Մենք պայքարելու ենք մինչև վերջ, որպեսզի պատերազմի ընթացքում ոտնահարված յուրաքանչյուր մարդու իրավունքը օրինականորեն պաշտպանված լինի մինչև վերջ»:
Նշենք, որ 2008 թվականի ռուս-վրացական պատերազմից հետո Մոսկվան Վրաստանի երկու շրջանները՝ Հարավային Օսիան և Աբխազիան, ճանաչել է որպես «անկախ պետություններ»:
