Թբիլիսիի հայկական թատրոնի շենքը սեպտեմբերից կընդունի իր հանդիսատեսին

Թբիլիսիի Պետրոս Ադամյանի անվան հայկական դրամատիկական թատրոնը սեպտեմբերից իր պատերի ներսում կհյուրընկալի հանդիսատեսին, «Ալիք Մեդիա»-ի հետ զրուցում ասաց թատրոնի գեղարվեստական ղեկավար Արմեն Բայանդուրյանը:

Բայանդուրյանը հավելեց՝ ներկայացումներ այժմ էլ կան, պարզապես՝ այլ թատրոնների բեմերում:

«Մեր թատրոնում դեռևս լուսավորության խնդիրը չի լուծվել, այդ իսկ պատճառով միայն սեպտեմբերին հնարավոր կլինի խաղալ մեր թատրոնի շենքում»,- ասաց Բայանդուրյանը:

Ի դեպ, հունվարի 26-ին, Թբիլիսիի պատանի հանդիսատեսի թատրոնում ներկայացվել է հայկական թատրոնի բեմադրած «Տիկին Սիրանույշ» պիեսը:

Հիշեցնենք, որ թատրոնի շենքի շինարարությունը մեկնարկել է 2017 թվականի օգոստոս ամսվանից, որն իրականացվում է Վրաստանի նախկին վարչապետ, մեծահարուստ Բիձինա Իվանիշվիլիին պատկանող «Քարթու» հիմնադրամի ֆինանսավորմամբ։ Հարկ է նշել, որ Թբիլիսիի Պետրոս Ադամյանի անվան հայկական պետական դրամատիկական թատրոնի վերաբացումը մի քանի անգամ հետաձգվել է. նախ նախատեսվում էր վերաբացել 2021 թվականին, այնուհետև 2022 թվականի սեպտեմբեր-հոկտեմբեր ամիսներին:

Նշենք, որ 2018 թվականին Վրաստանի խորհրդարանի մարդու իրավունքների պաշտպանության և քաղաքացիական ինտեգրման հանձնաժողովի նիստի ընթացքում այդ ժամանակ մշակույթի և սպորտի փոխնախարարի պաշտոնը զբաղեցնող Գիորգի Բաքրաձեն հայտարարել էր, որ թատրոնի նորոգման աշխատանքներն արդեն սկսված են, «Քարթու» հիմնադրամն ամբողջովին ստանձնել է շինարարական աշխատանքների ծախսերը՝ հատկացնելով ավելի քան 8 մլն լարի:

«Սամխարաուլիի անվան ազգային բյուրոն, որը կազմել էր վերականգնման նախագիծը, արդեն շինարարական գործընթացի ժամանակ եզրակացրել էր, որ շենքն ավելի շատ է վնասված, քան նախագիծը կազմելու առաջին փուլում էր թվում: Որոշում է կայացվել՝ համաձայնեցնելով ինչպես թատրոնի ղեկավարության, այնպես էլ դեսպանության, հայկական կողմի գործընկեր նախարարության հետ, որ «Քարթու» հիմնադրամը կստանձնի շենքը քանդելու և տեղում նորը կառուցելու պարտականությունը: Շինությունը կլինի ավելի ժամանակակից և բազմաֆունկցիոնալ»,- ասել էր Բաքրաձեն:

Թբիլիսիի Պետրոս Ադամյանի անվան պետական հայկական դրամատիկական թատրոնը 166 տարեկան է, հիմնադրվել է 1856-ին։ Հավլաբարում գտնվող ներկայիս շենքում թատրոնը սկսել է գործել 1937-ից, իսկ մինչ այդ ներկայիս Շոթա Ռուսթավելու անվան պետական դրամատիկական թատրոնի շենքում էր, որտեղ գործում էր նաև վրացական թատրոնը։

Թատրոնի շենքը՝ 2019 թվականի շինաշխատանքների ժամանակ