«Վրացական երազանք»-ի միակուսակցական խորհրդարանում Թեա Ծուլուկիանիի նախագահությամբ գործող քննչական հանձնաժողովը դիմելու է դատախազություն՝ «Միացյալ ազգային շարժում» (ՄԱՇ) կուսակցության ղեկավարման տարիներին տարբեր բարձրաստիճան պաշտոններ զբաղեցրած Իրակլի Օքրուաշվիլիի դեմ քրեական գործ հարուցելու համար։ Նրանք Օքրուաշվիլիի հետ հարցեր ունեին 2008 թվականի օգոստոսյան պատերազմի հետ կապված։
Օքրուաշվիլին տարբեր ժամանակներում եղել է ՄԱՇ-ի կառավարության պաշտպանության, ներքին գործերի և էկոնոմիկայի նախարար: Օքրուաշվիլին որևէ պաշտոն չի զբաղեցրել 2006 թվականի նոյեմբերից։
«Իհարկե, այդ նիստի ընթացքում մենք մի քանի անգամ կոչ ենք արել նրան ներկայանալ. այս պահին իրավիճակն այնպիսին է, որ հանձնաժողովի խնդրանքը չի կատարվել, հետևաբար առաջարկում ենք այս հարցը դնել քվեարկության. այս գործը նույնպես պետք է ուղարկվի դատախազություն», — ասել է Ծուլուկիանին։ Հանձնաժողովի բոլոր անդամները համակարծիք էին հարցի շուրջ։
TBC բանկի բաժնետերեր և ընդդիմադիր «Ուժեղ Վրաստան» կուսակցության առաջնորդներ Մամուկա Խազարաձեն և Բադրի Ջափարիձեն հրաժարվել են ներկայանալ հանձնաժողովի նույն նիստին։ Նրանց դեմ ևս «Վրացական երազանք»-ի խորհրդարանական ժամանակավոր քննչական հանձնաժողովը դատախազություն բողոք է ներկայացրել
Քրեական օրենսգրքի 349-րդ հոդվածի համաձայն՝ «Ժամանակավոր քննչական հանձնաժողովի պահանջը չկատարելը» պատժվում է տուգանքով կամ ազատազրկմամբ՝ առավելագույնը մեկ տարի ժամկետով։
Հանձնաժողովի մասին
ՄԱՇ-ի իշխանավարման ժամանակահատվածն ուսումնասիրող հանձնաժողով ստեղծելու մասին «Վրացական երազանք»-ը խոսեց 2025 թվականի հունվարի 9-ին։ Կուսակցության առաջնորդներից Մամուկա Մդինարաձեի խոսքով, հանձնաժողովը կուսումնասիրի.
- բանտերում բանտարկյալների նկատմամբ խոշտանգումների դեպքեր,
- սպանության, բռնության և անձնական կյանքի ներխուժման դեպքեր,
- կոռուպցիա և ճնշում բիզնեսի վրա, լրատվամիջոցների յուրացում,
- 2008 թվականի օգոստոսյան պատերազմի «մեկնարկի ճանաչում» և «ռազմական հանցագործությունների համար վրաց զինվորականներին մեղադրելը»,
- Մդինարաձեն նշել է, որ «2008 թվականի պատերազմի գործի հետաքննության թիրախները չեն լինելու ռազմական հրամանատարներն ու զինվորները»։
Հանձնաժողովը ստեղծվել է փետրվարի 5-ին՝ եռամսյա ժամկետով, որին աջակցել են «Վրացական երազանք»-ի 83 ներկայացուցիչներ։
Հանձնաժողովում աշխատում է ութ մարդ.
- «Վրացական երազանք»-ից՝ Թեա Ծուլուկիանին, Թենգիզ Շարմանաշվիլին, Ալեքսանդրե Տաբատաձեն, Ալուդա Ղուդուշաուրին, Պաատա Սալիան,
- Ընդդիմության քվոտան կվերցնեն «Վրացական երազանք»-ից անջատված, բայց նրա արբանյակ և կեղծ ընդդիմություն հանդիսացող «Ժողովրդի ուժ»-ից Սոզար Սուբարին, Գուրամ Մաճարաշվիլին և «Եվրոպական սոցիալիստներ»-ից Իլիա Ինջիան։
ՄԱՇ-ի գործունեության արգելումն ու կուսակցության համար «խիստ քաղաքական ու իրավական վճիռ» կայացնելը «Վրացական երազանք»-ի նախընտրական խոստումն էր, որի համար կուսակցությունը մտադիր էր խորհրդարան մտնել սահմանադրական մեծամասնությամբ, ինչը չհաջողվեց:
