Թբիլիսիի քաղաքային դատարանը կասեցրել է Կախա Ծիքարիշվիլիին Արդարադատության բարձրագույն խորհրդի (ԱԲԽ) ոչ դատավոր անդամ նշանակելու մասին Վրաստանի նախագահ Սալոմե Զուրաբիշվիլիի 2024 թվականի հուլիսի 15-ի հրամանագրի գործողությունը։ Այդ վճիռը հիմնված է մրցույթի մասնակիցներից մեկի՝ Մանուչար Կակոչաշվիլիի հայցի վրա։

Դատարանի որոշմամբ՝ Վրաստանի նախագահի 2024 թվականի հուլիսի 15-ի հրամանագրի գործողությունը կասեցվել է մինչև դատավարության ավարտը։

Դրանից բացի, մինչև գործով վարույթի վերջնական ավարտը Վրաստանի նախագահին արգելվել է նոր մրցույթ անցկացնել և Վրաստանի արդարադատության բարձրագույն խորհրդի ևս մեկ նոր անդամ նշանակել (ցանկացած ձևով)։

Նախագահի խորհրդարանական քարտուղար Գիորգի Մսխիլաձեն արձագանքել է Թբիլիսիի քաղաքային դատարանի որոշմանը: Մսխիլաձեն մատնանշել է Վրաստանի դատական ​​համակարգում կլանային իշխանությունը և շեշտել նախագահի սահմանադրական իրավունքներին միջամտությունը։

«Վրաստանի պատմության մեջ աննախադեպ բան է տեղի ունեցել, այս անգամ վրացական դատական ​​իշխանությունն ուղղակիորեն և ապօրինի միջամտել է նախագահի սահմանադրական լիազորություններին և կասեցրել Արդարադատության բարձրագույն խորհրդի անդամի նշանակման սահմանադրական ակտը։

Մինչդեռ նախագահը Վրաստանի Սահմանադրությամբ լիակատար լիազորություններ ունի՝ ընդունելու համար Արդարադատության բարձրագույն խորհրդի անդամի ընտրության և նշանակման միասնական որոշում»,- ասել է Մսխիլաձեն:

Նախագահի աշխատակազմը դիմել է հանրությանը, դիվանագիտական ​​կորպուսին, միջազգային հանրությանը, միջազգային կազմակերպություններին, ԵԱՀԿ/ԺՀՄԻԳ-ին, որոնց ներկայացուցիչները հետևել են Արդարադատության բարձրագույն խորհրդի անդամության թեկնածուի ընտրության գործընթացին։ Վարչակազմը կոչ է անում բոլորին պատշաճ արձագանքել այս հարցին։

Հիշեցնենք. Արդարադատության բարձրագույն խորհրդում Վրաստանի նախագահի նշանակած Թամար Գվամիչավայի լիազորությունների ժամկետը լրացել է 2024 թվականի հուլիսի 22-ին։ Թեկնածուներին ընտրելու համար նախագահի աշխատակազմը մրցույթ էր հայտարարել: Հատուկ ստեղծված հանձնաժողովը հինգ թեկնածուներից առաջարկել էր Գիորգի Բուրջանաձեին և Կախա Ծիքարիշվիլիին։ Վրաստանի նախագահը նախընտրել է Ծիքարիշվիլիին։