Ամերիկացի 11 սենատոր դատապարտել են «գործակալների մասին օրենքի» ընդունումը՝ ընդգծելով, որ «ռուսական» օրինագիծը լրջորեն կսահմանափակի խոսքի ազատությունը և ժողովրդավարական պատասխանատվությունը Վրաստանում։
«Սև օր է վրացական ժողովրդավարության համար»,- գրել են սենատորները համատեղ հայտարարության մեջ՝ «ծայրահեղ հիասթափություն» հայտնելով օրենքի ընդունման կապակցությամբ։
Նրանց խոսքով, քվեարկությունն անցկացվել է հարյուր հազարավոր վրացիների ցանկության դեմ, ովքեր շարունակում են խաղաղ կերպով բողոքել օրենքի դեմ: Սենատորների կարծիքով, օրենքը ոչ միայն կօգտագործվի խոսքի ազատությունը սահմանափակելու համար, այլև կխոչընդոտի Վրաստանում ժողովրդավարության առաջընթացին:
«Օրենքի ընդունումը հիմնովին կփոխի Վրաստանի հարաբերությունները Միացյալ Նահանգների հետ, կվնասի Եվրամիությանն անդամակցելու նրա ձգտումներին»,- համոզված են սենատորները։
Նրանք հիշեցրել են Վրաստանի վարչապետ Իրակլի Կոբախիձեին ուղարկված նախազգուշական նամակն այն մասին, որ «գործակալների մասին օրենքի» ընդունումից հետո Կոնգրեսը կարող է քննարկել Վրաստանի նկատմամբ ԱՄՆ քաղաքականությունը փոխելու հարցը՝ «Վրաստանի նոր քաղաքական լանդշաֆտն արտացոլելու համար»։
Վրաստանի խորհրդարանը մայիսի 14-ին երրորդ ընթերցմամբ ընդունել է «Գործակալների մասին օրենքը», որին աջակցել է 84 պատգամավոր։
Օրենքի դեմ բողոքի ակցիաներ են անցկացվում Վրաստանում արդեն մոտ մեկ ամիս. միջազգային գործընկերները զգուշացրել են Վրաստանի իշխանություններին, որ այս օրենքի ընդունումը և երկրի եվրաինտեգրումն անհամատեղելի են։
Խորհրդարանն ընդունեց «գործակալների մասին» աղմկահարույց օրենքը
