ԱՄՆ Սենատի արտաքին հարաբերությունների հանձնաժողովի անդամներ՝ սենատորներ Բեն Կարդինը, Ջիմ Ռիշը, Ջին Շահինը և Փիթ Ռիքեթսը մտահոգված են Վրաստանի Հակակոռուպցիոն բյուրոյի որոշմամբ, ըստ որի՝ «Թրանսփարենսի Ինթերնեշնլ-Վրաստան»-ի և «Ընտրիր Եվրոպա»-ի տնօրենները հայտարարվել են «ընտրական նպատակներ հետապնդող անձինք»:
Սենատորների համատեղ հայտարարությունը հրապարակվել է կոմիտեի կայքում։ Ըստ սենատորների՝ «Թրանսփարենսի Ինթերնեշնլ-Վրաստան»-ի տնօրեն Էկա Գիգաուրին պատժվում է սեպտեմբերի 12-ին Սենատի արտաքին հարաբերությունների հանձնաժողովի լսումների ժամանակ իր վերջին ելույթի համար: Սենատորները նշել են՝ «Թրանսփարենսի Ինթերնեշնլ-Վրաստան»-ը և «Ընտրիր Եվրոպա»-ն ժողովրդավարությունը հարգող կազմակերպություններ են:
«Անարդար է, որ Թրանսփարենսի Ինթերնեշնլ-Վրաստանի տնօրեն Էկա Գիգաուրին պատժվում է սեպտեմբերի 12-ին Սենատի արտաքին հարաբերությունների հանձնաժողովի լսումների ժամանակ իր վերջին ելույթի համար: Այդ մասին երեկվա հայտարարությունը վկայում է այն մասին, որ ավտորիտար կառավարությունները չարաշահում են օրենքները՝ պատժելու անկախ ձայներին»,- ասված է հայտարարության մեջ։
Հիշեցնենք. Հակակոռուպցիոն բյուրոյի ղեկավար Ռաժդեն Կուպրաշվիլին սեպտեմբերի 24-ին կայացած ճեպազրույցում հանրությանը տեղեկացրել է ՀԿ-ների ղեկավարների նկատմամբ ընդունված որոշման մասին։ Ճեպազրույցում վարչապետ Իրակլի Կոբախիձեի նշանակած Կուպրաշվիլին պարզաբանել է, որ ՀԿ-ները որպես ընտրական նպատակներ ունեցող սուբյեկտներ հռչակելու հիմք են հանդիսացել ՀԿ-ների հանդիպումները քաղաքացիների հետ և տեղեկատվական արշավները, որոնց ընթացքում ՀԿ-ները քաղաքացիներին կոչ են արել կատարել եվրոպական ընտրություն և, ըստ Հակակոռուպցիոն բյուրոյի, հանդես գալ հակապետական ու զրպարտչական հայտարարություններով։
Հակակոռուպցիոն բյուրոյի որոշումը՝ հերթական ռեպրեսիա քաղհասարակության դե՞մ. կարծիքներ
