Շաբաթ օրը՝ օգոստոսի 31-ին, Վրաստանի Սահմանադրական դատարանում (ՍԴ) ավարտվել է սովորականից երկարատև կանոնակարգային նիստը, որտեղ քննարկվում էր «գործակալների օրենք»-ը։

Երեք օր տևած բանավեճերից ու հարցերից հետո դատարանը մտավ խորհրդակցական սենյակ։ Դատարանը՝ դատավորների պլենումը, այժմ պետք է որոշի երկու հարց.

• Արդյո՞ք սկսելու է «գործակալների օրենք»-ը և դրա կոնկրետ հոդվածները հակասահմանադրական ճանաչելու գործի բովանդակային վերանայումը,
• Եթե ​​վերանայում սկսի, արդյո՞ք ժամանակավորապես կկասեցնի օրենքի կիրարկումը մինչև վերանայման ավարտը։

Դատարանի որոշման կայացման մասին հստակ ժամկետ դեռ հայտնի չէ։ ՍԴ նախագահ Մերաբ Տուրավան նիստի ավարտին ասել է, որ «դատական ​​ակտի ընդունման մասին կողմերը լրացուցիչ կտեղեկացվեն»։ Սակայն՝ չի նշել ժամկետը։ Կողմերն ակնկալում են, որ որոշման հրապարակումը չի ուշանա։

Սահմանադրական դատարանի պլենումը բաղկացած է ինը դատավորից։ Որոշումները կայացվում են մեծամասնությամբ։ Սա նշանակում է, որ որոշման համար անհրաժեշտ է նվազագույնը հինգ ձայն։

Ներկայումս «գործակալների օրենք»-ի լսումներին մասնակցել է ընդամենը ութ դատավոր։ Ըստ դատարանի՝ դատավորներից մեկը` Իրինե Իմերլիշվիլին, առողջական վիճակի պատճառով չի կարող ներկայանալ նիստերին։ Նույնիսկ ութ հոգանոց հանձնաժողովում որոշում կայացնելու համար անհրաժեշտ է նվազագույնը հինգ ձայն:

Քաղաքականապես զգայուն վերջին գործերից մեկը, որ դատարանն այս կազմով քննել էր, նախագահ Սալոմե Զուրաբիշվիլիի իմփիչմենթի հարցն էր։ Ինը դատավորներից վեցը որոշել են, որ նախագահը սահմանադրախախտ է։

Այժմ ՍԴ-ն քննում է, թե որքանով է «գործակալների օրենք»-ը համապատասխանում Վրաստանի Սահմանադրությանը։ Սա անկախ Վրաստանի և Սահմանադրական դատարանի պատմության կարևորագույն հայցերից մեկն է։

Խորհրդարանի դեմ համատեղ պայքարում են Վրաստանի նախագահը, ավելի քան 100 հասարակական կազմակերպություն, ԶԼՄ-ները և խորհրդարանական ընդդիմությունը։ Չորս առանձին հայցերով նրանք ՍԴ-ից պահանջում են չեղյալ համարել Վրաստանի եվրաինտեգրումն արգելակող «ռուսական օրենք»-ը։