Վրաստանի հինգերորդ նախագահ Սալոմե Զուրաբիշվիլին մարտի 10-ին հանդիպել է ընդդիմադիր կուսակցությունների ներկայացուցիչների հետ։ Հանդիպումից հետո ներկայացոցիչները լրատվամիջոցներին հայտնել են, որ, ի թիվս այլ հարցերի, քննարկել են «համատեղ կոորդինացիոն ճակատի» ստեղծման հարցը։
«Միացյալ ազգային շարժման» նախագահ Թինա Բոկուչավայի կարծիքով՝ կարևոր է, որ համակարգող ճակատը աշխատի կոնկրետ նպատակների համար, արդյունավետ լինի, դրան մասնակցեն ոչ միայն կուսակցությունները, այլև հասարակական խմբերը։
Նրա խոսքով, հանդիպմանը քննարկվել է նաև մարտի 31-ին կայանալիք «մեծ հանրահավաքի» նախաձեռնությունը.
«Մենք քննարկել ենք մարտի 31-ի մեծ հանրահավաքի հարցը, որը Վրաստանի անկախության հանրաքվեի օրն է և շատ կարևոր օր է Վրաստանի անկախության պատմության մեջ, մենք միասին կսկսենք նախապատրաստական աշխատանքները»:
«Լելո»-ի առաջնորդ Բադրի Ջափարիձեն լրագրողների հետ զրույցում ասել է, որ հինգերորդ նախագահի հետ պետք է մշակվի միասնական ֆորմատ, որին կմասնակցեն բողոքի ակցիայի մասնակից քաղաքական խմբերն ու հանրությունը։
«Ֆեդերալիստներ» կուսակցության առաջնորդ Թամար Չերգոլեիշվիլին հայտարարել է, որ Զուրաբիշվիլիի հետ հանդիպման ժամանակ քննարկել են նոր ընտրությունների նախապատրաստման հարցը, այդ թվում՝ քաղբանտարկյալների և օրենսդրական դաշտի հարցերը։
«Գլխավորն այն է, որ մեր ուշադրությունը մնա նոր ընտրությունների վրա, և ես կարծում եմ, որ մենք կհասնենք նոր ընտրությունների»,- ասել է Չերգոլեիշվիլին։
