Վրաստանի պետական աուդիտի ծառայության բողոքի հիման վրա դատարանը ռուսամետ «Պահպանողական շարժմանը» (Ալտ-Ինֆո) տուգանել է 216 հազար լարիով (մոտ 72 հազար դոլար): Փոխանցում է Netgazeti-ին՝ հղում անելով աուդիտորական ծառայությանը:
«Պահպանողական շարժման» դեմ աուդիտի ծառայությունը դատարան էր դիմել երկու հարցով:
«Կուսակցությունը 2021 թվականի հայտարարագիրը սխալ է ներկայացրել Վերստուգիչ ծառայություն, մասնավորապես՝ նշելով, թե դեկտեմբերին ֆինանսական շրջանառություն չի ունեցել, բայց կուսակցության գրասենյակների մեծ մասը բացվել է դեկտեմբերին։
Թաքցրել է նվիրատվությունները: Կուսակցությունը վերստուգիչ ծառայությանը չի ներկայացրել ֆիրմային նյութերի արտադրության և տարածքային գրասենյակների վերանորոգման ձևով ստացված ոչ դրամական նվիրատվությունների վերաբերյալ տեղեկատվություն։ Կուսակցությունը նաև մի քանի գրասենյակ է ղեկավարել առանց պայմանագրի (այսինքն՝ սկզբում գրասենյակ են բացել, իսկ պայմանագիրը կնքվել է ավելի ուշ)։ Ընդհանուր առմամբ, թաքցրած ոչ դրամական նվիրատվությունը կազմում է ավելի քան 72 հազար լարի»,- ասված է աուդիտորական ծառայության կողմից տարածած տեղեկատվության մեջ։
Գործակալության տվյալներով՝ դատարանի որոշմամբ կուսակցությունը պարտավոր է վճարել թաքցրած գումարի եռապատիկը։
Կուսակցության առաջնորդ Կոկա Մորգոշիան մեկնաբանել է դատարանի որոշումը՝ նշելով, որ բողոքարկելու են որոշումը, սակայն, եթե իրենց բողոքը չբավարարվի, կուսակցությունը կվճարի տուգանքը:
Նշենք, որ Վրաստանում գործող «Ալտ—Ինֆո» կուսակցության հիմնական նպատակներից է համարվում Ռուսաստանի հետ «ուղիղ, անվերապահ» երկխոսությունը՝ Վրաստանի եվրաատլանտյան նկրտումներից հրաժարվելու դիմաց։ Հայտնի է նաև փոքրամասնությունների ներկայացուցիչների գործունեությունը սահմանափակելու նրանց ծրագրի մասին։ Հստակ ռուսամետ քաղաքական ուժը միշտ պնդում է, որ իրականում ոչ թե ռուսամետ, այլ ազգային, վրացամետ քաղաքական ուժ է։ Կուսակցությունը նախատեսում էր Վրաստանի մասշտաբով 85 գրասենյակ բացել:
«Ալտ-Ինֆո»-ի նկատմամբ իշխանության կողմից լոյալության նշաններ կան. SJC
