Թբիլիսիում այցով գտնվող Բունդեսթագի արտաքին հարաբերությունների հանձնաժողովի նախագահ Միխայիլ Ռոթն ասել է, որ եթե «ռուսական օրենքն» ընդունվի, Վրաստանի հետ անդամակցության շուրջ բանակցություններ չեն սկսվի։ Այս հայտարարությունը նա արել է Վրաստանի ընդդիմության անդամների հետ հանդիպումից հետո։

Նրա խոսքով, եվրոպական պատվիրակությունը եկել է Վրաստան շատ հստակ ուղերձով՝ Վրաստանի տեղը Եվրոպայում է:

«Մենք վրաց ժողովրդի բարեկամներն ենք, մենք խորապես հավատում ենք, որ Վրաստանի տեղը Եվրոպայում է, և դա նշանակում է, որ մենք քրտնաջան աշխատում ենք Վրաստանի ճանապարհը դեպի Եվրամիություն զարգացնելու համար»,- ասել է Ռոթը:

Վրաստանի կառավարությանն ու իշխող կուսակցությանը Ռոթը կոչ է արել փակել «օտարերկրյա գործակալների» օրենքի էջը. «Ես Վրաստանի պայծառ ապագայի հնարավորություն չեմ տեսնում, եթե կառավարությունը հետ չկանչի այս օրենքը։ Իմ հարգանքն եմ հայտնում վրացի ժողովրդին, որը խաղաղ ցույց է անում փողոցում: Այս դժվարին մարտահրավերների ժամանակ Թբիլիսին իսկական եվրոպական մայրաքաղաք է։ Հուսով եմ՝ հնարավորություն կունենամ զրուցելու իշխանության, խորհրդարանի, ինչպես նաև ընդդիմության և քաղաքացիական հասարակության ներկայացուցիչների հետ»:

Նա նաև հավելել է՝ «գործակալների օրենքի» առկայության պայմաններում բանակցություններ սկսելու հնարավորություն չի տեսնում, և ԵՄ-ի ուղերձը շատ պարզ է:

Ռոթը եվրոպացի դիվանագետների հետ միասին այսօր՝ մայիսի 13-ին, լուսադեմին է ժամանել Թբիլիսի։ Այսօր՝ ժամը 9-ին, խորհրդարանի իրավական հանձնաժողովում երրորդ ընթերցմամբ ընդունվել է «գործակալների օրենքը», որի դեմ քաղաքացիները շաբաթներ շարունակ ակցիա են անում։ Խնդրահարույց օրենքի նախագծի քննարկումն այսօր տևել է 67 վայրկյան, իսկ ոստիկանությունը բողոքի ակցիայի ժամանակ բերման է ենթարկել 20 հոգու։ Նրանցից ոմանք կալանքի ժամանակ ենթարկվել են ֆիզիկական բռնության։

Ի դեպ, մայիսի 10-ին խորհրդարանի նախագահ Շալվա Պապուաշվիլին ասել է, որ չի հանդիպելու եվրոպական երկրների արտաքին հարաբերությունների հանձնաժողովների նախագահներին, քանի որ նրանք հարմար ժամանակ չեն ընտրել իրենց այցի համար։