Ռուսաստանի արտաքին գործերի նախարարության փոխնախարար Միխայիլ Գալուզինը խոսել է Վրաստանի հետ հարաբերությունների զարգացման մասին, փոխանցում է netgazeti.ge-ն:
Լրագրողի հարցին, թե ինչից է կախված Ռուսաստանի և Վրաստանի միջև դիվանագիտական հարաբերությունների վերականգնումը, ռուս քաղաքական գործիչը պատասխանել է հետևյալ կերպ.
«Ընդհանրապես պայմաններ պարտադրելը մեր քաղաքականությունը չէ, թեև առանձին դեպքերում դա պետք է անենք որպես բացառություն։ Մենք կողմնակից ենք հարևան Վրաստանի հետ հարաբերությունների զարգացմանը, մի երկրի, որի հետ մեզ միավորում են ընդհանուր պատմությունը և մշակութային ավանդույթները, ընդհանուր հավատքը, մարդկային ու ազգակցական լայն կապերը»:
Նրա խոսքով, «Վրացական երազանք»-ը վարում է պրագմատիկ քաղաքականություն, և ռուս-վրացական համագործակցության զարգացումը բխում է երկու երկրների ժողովրդի շահերից։
«Հենց դա են թելադրում Ռուսաստանի որոշումները, ինչպիսիք են օդային հաղորդակցության վերականգնումը և առանց վիզայի ռեժիմի վերականգնումը նրանց համար, ովքեր մեր երկիր են գալիս կարճաժամկետ այցով։ Մենք պատրաստ ենք առաջ շարժվել այս ուղղություններով և զարգացնել համագործակցությունը Վրաստանի հետ։ Մենք եղել ենք և կշարունակենք լինել Վրաստանի գլխավոր տնտեսական գործընկերը»։
Գալուզինը նաև հույս ունի, որ «հարաբերությունների հետևողական զարգացումը, դիվանագիտական հարաբերությունների վերականգնումը կհանգեցնեն դրան».
«Մենք պատրաստ ենք գնալ այնքան հեռու, որքան պատրաստ է վրացական կողմը, այս առումով մեզ համար սահմանափակումներ չկան»։
Հիշեցնենք նաև, որ 2008 թվականից՝ վրաց-ռուսական օգոստոսյան պատերազմից հետո, Վրաստանի և Ռուսաստանի միջև դիվանագիտական հարաբերությունները խզվել են։
