Վրաստանյան «Պուբլիկա» լրատվամիջոցի ծեծված լրագրող Ալեքսանդրե Քեշելաշվիլիին Թբիլիսիի քաղաքային դատարանի դատավոր Նինո Էնուքիձեն մեղավոր է ճանաչել ոստիկանությանը չենթարկվելու համար և բանավոր նկատողություն է արել։ Մանր խուլիգանության դեպքով գործը կարճվել է:
Ներքին գործերի նախարարության կողմից 2024 թվականի նոյեմբերի 29-ի գիշերը բերման ենթարկված և ծեծված Քեշելաշվիլիին մեղադրանք էր առաջադրվել այս երկու հոդվածներով: Քեշելաշվիլիի ձերբակալության մասին արձանագրությունը կազմվել է նոյեմբերի 29-ին, ժամը 01:55-ին։
Խոսքը նոյեմբերի 28-ի գիշերը տեղի ունեցած իրադարձությունների մասին է. բողոքի ցույց, որտեղ մարդիկ ինքնաբուխ հավաքվել էին ի պատասխան «Վրացական երազանք»-ի որոշման։ Այդ օրը «Վրացական երազանք»-ի վարչապետ Իրակլի Կոբախիձեն ասել է. «Մենք որոշում ենք կայացրել Եվրամիության հետ բանակցությունների բացման հարցը օրակարգ չդնել մինչև 2028 թվականի վերջը»։
Քեշելաշվիլին լուսաբանել է բողոքի ցույցը, նրան բերման են ենթարկել և դաժան ծեծի ենթարկել դիմակավորված անձինք։ Ոստիկանության բաժին բերման ենթարկվելուց հետո նրան ասել են, որ իրեն ձերբակալում են օրենքի խախտման համար:
Լրագրողն այդ օրը հայտնվել է հիվանդանոցում՝ քթի կոտրվածքով, վիրահատության անհրաժեշտություն է ծագել։ Հատուկ քննչական ծառայությունը հետաքննություն է սկսել լրագրողի նկատմամբ բռնություն գործադրելու դեպքի առթիվ։ Մեղավոր չի հայտնաբերվել: Լրագրողը տուժողի կարգավիճակ ունի: Հատուկ քննչական ծառայության եզրակացությամբ` խոչընդոտել են նրա լրագրողական գործունեությունը։
