«Պիրվելի» հեռուստաընկերության (ՀԸ) լրատվական ծառայության ղեկավար Նոդար Մելաձեն Կենտրոնական ընտրական հանձնաժողովի (ԿԸՀ) նախագահ Գիորգի Կալանդարիշվիլիին մեղադրել է լրագրողների վրա ճնշում գործադրելու համար։ Կալանդարիշվիլին միջադեպը թյուրիմացություն է գնահատում:
ԿԸՀ-ում կայացած ճեպազրույցում Կալանդարիշվիլին «Պիրվելի» ՀԸ-ի «ներկայացուցիչներից մեկին», ընտրական վարչության աշխատակիցների վրա ճնշում գործադրելու նպատակով, նրանց անձնական տվյալները «մշակելու և օրենքին հակառակ օգտագործելու» համար է մեղադրել:
«Նշված լրատվամիջոցի ներկայացուցիչների տրված հարցերի բովանդակությունը և ձևն ընտրական վարչության աշխատակիցներին կամ նրանց ընտանիքի անդամներին չեն կարող ծառայել հանրային որևէ շահի, բացառությամբ ընտրական վարչության աշխատակիցներին իշխող կուսակցության հետ կապելու փորձ կատարելուց, տարբեր գերատեսչություններում նրանց հարազատների գործունեության կամ հնարավոր գործունեության պատճառով իրենց գործունեությունը կողմնակալ կերպով ներկայացնելով և դրանով իսկ վնասելով ընտրական վարչակազմի հեղինակությանը, ինչն իր հերթին կխոչընդոտի ընտրությունների արդիականացման կարևոր գործընթացին և կվնասի ընտրական միջավայրին»,- ասել է Կալանդարիշվիլին։
Ըստ նրա՝ ընտրական վարչության որևէ աշխատակցի գործունեությունն օրենքով գնահատելու չափանիշ չեն կարող լինել ոչ ընտանեկան կապերը, ոչ ընտանիքի անդամների կամ հարազատների գործունեությունը։ Կալանդարիշվիլիի խոսքով, «ընտրական վարչակազմը թույլ չի տա աշխատակիցների վրա ճնշում գործադրել, և օրենքով նախատեսված միջոցներ կձեռնարկվեն յուրաքանչյուր փաստի առնչությամբ»։
Մելաձեի կարծիքով՝ ԿԸՀ նախագահը ճնշում է գործադրում լրագրողների վրա և փորձում է շաբաթ օրը հեռարձակվելիք սյուժեի թիմին ստիպել, որ ԿԸՀ գործունեության մասին լուրեր չհրապարակեն։
«Սա սուտ է. եթե լրագրողը հայթայթում է հեռախոսահամար կամ հասցե՝ հարցեր տալու և որոշակի նյութի հետ կապված փաստեր ստուգելու համար, ինչո՞ւ է դա համարվում անձնական տվյալների անօրինական մշակում»,- ասել է Մելաձեն։
Նրա խոսքով, հետաքննական հեռուստանախագծի լրագրողները ԿԸՀ նախագահի հայտարարությունն ընկալում են որպես լրատվամիջոցների հետ համագործակցության վերանայման իրական սպառնալիք։
«Պիրվելի» ՀԸ-ն այս պահին պատրաստում է սյուժեն, որը դեռ չի հեռարձակվել։
